Shackixning aytishicha, ish jadvali sababli u Kolumbiyaga qarshi o'yinning faqat ikkinchi bo'limini tomosha qilgan.
- Mamlakatda tarixiy voqea - ilk Jahon chempionati qanday qarshi olinmoqda?
- Bu haqiqatan ham tarixiy voqea. O'zbekiston birinchi marta Jahon chempionatiga chiqdi, buni hamma uzoq kutdi.
Ikkinchi bo'limda yigitlar yomon o'ynashmadi, harakat qilishdi. Qo'llaridan kelganini qilishdi. Yaxshi yoki yomon o'ynagani boshqa masala. Birinchi marta shunday muhitga tushganlari uchun hayajon sezilib turdi.
Eng muhimi - jamoa tarixiy birinchi golini urdi. Keyin esa ikkita juda omadsiz gol o'tkazib yubordi: birinchisi qo'pol xato evaziga, ikkinchisi esa tushunarsiz vaziyatda to'p darvozaga kirib ketdi. Umuman olganda, ikkinchi taymda ma'lum imkoniyatlar yaratildi, axir raqib Kolumbiya edi. Kolumbiyaliklar qayerda o'ynaydi, bizning futbolchilar qayerda o'ynaydi - shunga ham qarash kerak. Rostini aytsam, jamoa munosib o'yin ko'rsatdi.
- Umuman olganda, O'zbekistondan bu Jahon chempionatida nimani kutyapsiz?
- Pley-offga chiqishini kutyapman. Masalan, hamma Portugaliya Kongo DRni oson yutadi degan edi, men esa bu oson bo'lmaydi deb aytgandim. Demak, ham portugallar bilan, ham kongoliklar bilan o'ynash mumkin. Bu - futbol.
Har bir Jahon chempionati va Yevropa chempionatida bo'lgani kabi, bu safar ham kutilmagan natijalar bo'lmoqda. Shuning uchun nega O'zbekiston ham syurpriz qilmasligi kerak? Ko'ramiz.
- Jahon chempionati va uning tashkil etilishi haqida qanday fikrdasiz? O'yinlarni kuzatyapsizmi?
- Men atigi uchta o'yin ko'rdim. Hozir Qirg'izistondaman va vaqt jihatidan hammasini ko'rish qiyin. Hozir Chexiya - JAR uchrashuvini ko'ryapman. Shuningdek, Ispaniya va Fransiya o'yinlarini tomosha qildim. Qolgan o'yinlar tungi 2, 4, 5, 6 yoki 8 da boshlanadi. Mening ham o'z ishim bor, tayyorgarlik ko'rishim kerak. Shuning uchun ko'p o'yin ko'ra olmayapman.
Tashkilotchilikka kelsak, ko'plab shikoyatlarni eshitdim, lekin bu haqda gapirishni istamayman. Qolgan jihatlari esa menga yoqmoqda. Maydonlar sifati, muxlislar, stadionlar - men ko'rayotgan narsalarning barchasi yuqori darajada tashkil etilgan, - dedi Shackix.
