Олдинроқ франциялик вингер Мао Цзэдун ҳақидаги ҳазили сабаб можаро марказида қолган эди. Мазкур фикр Хитой ижтимоий тармоқларида норозилик тўлқинини келтириб чиқарди, фойдаланувчилар Мбаппени мамлакат тарихини ҳурмат қилмасликда айблашди.
"Реал Мадрид" футбол клуби ўйинчимиз Килиан Мбаппенинг яқинда айтган сўзлари келтириб чиқарган эҳтимолий ноқулайликлар учун Хитой халқидан узр сўрайди. Клубимиз Хитойга, унинг тарихи, маданияти ва фуқароларига, шунингдек, "Реал"га меҳр қўйган ҳамда унга ҳавас қиладиган миллионлаб хитойлик мухлисларга чуқур ҳурмат билан муносабатда бўлади.
Клуб Килиан Мбаппенинг ўз сўзларидан афсусда эканлигини билдирган ва Хитой халқига ҳурматини тасдиқлаган оммавий узрига қўшилади. "Реал Мадрид" турли маданиятлар ўртасидаги ҳурмат, ҳамжиҳатлик ва ўзаро тушуниш қадриятларига содиқлигини тасдиқлайди ҳамда Хитой ва унинг фуқаролари билан боғлаб турувчи дўстлик ҳамда меҳр-оқибат ришталарини бундан кейин ҳам мустаҳкамлашни истайди", — дейилади "Реал"нинг расмий сайтида эълон қилинган баёнотда.
