Шанба куни "Мадрид" Ла Лига доирасида "Леванте"ни (2:0) мағлуб этди. Бунгача "қаймоқранглилар" Испания Суперкубоги финалида имкониятни бой бериб, мамлакат Кубогидан чиқиб кетишганди. "Сантьяго Бернабеу" мухлислари ғалабага қарамай, жамоани ҳуштаклар билан кутиб олишди ва кузатиб қўйишди.
"Беллингемнинг маҳоратига ҳеч кимда шубҳа йўқ. У улкан потенциалга эга. Жуд яхши спорт формасида бўлса, дунёнинг энг яхши футболчиларидан бирига айланади.
Ҳозир ҳамма учун қийин давр. Мухлисларнинг норозилигини тушунамиз. Лекин улар битта одамга ёпишиб олмай, ҳаммага эътироз билдиришлари керак. Бу фақат Жуднинг ёки бошқа бировнинг айби эмас. Вазиятни ўзгартириш — бизнинг вазифамиз.
Ла Лигада ғалаба қозондик, энди бор эътиборни Чемпионлар Лигасига қаратишимиз керак. Агар мухлислар бизнинг ҳаракат қилаётганимизни ва яхши ўйнаётганимизни кўришса, яна бизни қўллаб-қувватлашади", — деди Мбаппе ЧЛ доирасидаги "Монако"га қарши ўйин олдидан ўтказилган матбуот анжуманида.
