Жанубия Корея терма жамоаси сардори дурангда мухлисларни айблагани учун узр сўради

Straitstimes нашрининг маълум қилишича, ўйиндан сўнг кореяликлар сардори Ким Йонг-Гвон ушбу дурангда мухлисларни айблаган.

"Мухлисларнинг овози жуда баланд эди, жамоадошларимнинг гапини эшитиш жуда қийин бўлди. Бор овозимиз билан бақирганимизда ҳам ҳеч нарса эшитилмасди. Бундай ҳолат бўлишини кутгандик, аммо жамоадошларимни эшита олмаслик ноқулайлик келтириб чиқарди" - деган эди Ким Йонг-Гвон Эронга қарши баҳсдан сўнг.

Ушбу сўзлардан ғазабланган кореялик ишқибозлар, терма жамоа сардорини ҳақоратлар билан "кўмиб ташлашди".

"Омадсиз ўйин учун мухлисларни айблаган футболчини ҳеч қачон кўрмаган эдим. Уят сенга!" - деб ёзди ишқибозлардан бири.

"Учрашув жимликда ўтганида яхшироқ ўйнармидингиз, мен бундай деб ўйламайман" - дея изоҳ қолдирган яна бир мухлис.

Ўйиндан бир кун ўтиб, Корея терма жамоаси сардори мухлислардан кечирим сўради.

"Бизни қўллаб-қувватлаган барча мухлислар олдида узр сўрайман. Мен буни назарда тутмаган эдим. Хато қилдим. Бундан жуда афсусдаман" - дейди Ким Йонг-Гвон.

Эслатиб ўтамиз, Сеулдаги "Seoul World Cup" стадионида бўлиб ўтган баҳсга 63124 мухлис ташриф буюрган.