- Ўйин ҳақида фикрингиз?
- Ўйлайманки, учрашув ҳар икки жамоа учун қизиқ кечди. Таркибимизда жароҳат олган ўйинчилар бор, шу сабаб ўйин амалиёти кам футболчиларни майдонга тушириб, уларга имкон бердик. Амалиёт камлиги сабаб уларнинг ўйинга мослашиб кетиши қийин кечди ва бу ҳам ўз таъсирини кўрсатди. Кейинги баҳсларда улар ўзларини кўрсатади деб ўйлайман. Секин-аста ҳаммаси бўлади. Иккинчи бўлимда ўзимизга келиб олдик ва ўзимиз хоҳлаган футболни намойиш этдик. Мақсадимиз рақиб томонида қисқа паслар билан ўйинни назорат қилиш эди, бунинг уддасидан чиқдик. Бунинг натижасида вазият яратиб гол урдик. Ўйиндан ўйинга футболчиларимиз ривожланмоқда деб айта оламан.
- "Шўртан" билан ўйинга қандай тактика танланганди: биринчи рақамли жамоа сифатида ўйнашми ёки қарши ҳужумларда ҳаракат қилиш?
- Биз доим тўп билан ўз ўйинимизни кўрсатишга ҳаракат қиламиз. Рақиб майдонида позицион ҳужумлар қилиш бизнинг устун жиҳатимиз деб ҳисоблайман. Биринчи бўлимда бу ишни кўнгилдагидек бажара олмадик. Фақат иккинчи таймда уддаладик. "Шўртан" яхши жамоа, ҳимоячилари ҳам кучли, таркибида маҳоратли ўйинчилар йиғилган, шу сабабли прессинга доим бормадик.
- Жамоангиз асосан 18-19 ёшли футболчилардан иборат. Ҳатто 2010 йилда туғилган футболчи ҳам бор экан. Жамоа кучайиши учун ёши катта футболчи олиш режангиз борми?
- Жамоамиз лойиҳа асосида ташкил қилинган бўлиб, мақсадимиз ёшларни терма жамоага тайёрлаб бериш. Биласиз, келаси йил U-20 Жаҳон чемпионатига мезбонлиқ қиламиз ва ушбу мусобақада шу ёшдагилар ўйнайди. Асосий ўйиничларимиз Суперлигада ҳаракат қилаётгани туфайли уларга тегмаган ҳолда захира варианти сифатида "Республика ФА"ни ташкил қилганмиз. Ўз клубларида ўйин амалиёти кам футболчиларни жалб қилганмиз. Биздаги ўйинчиларнинг аксари ўтган йил биринчи лигада ўйнаган. Бу йил Пролигада дебют қилишяпти. Тўғри айтдингиз, 2010 йилда туғилган футболчиимиз ҳам бор. Шундан келиб чиқиб ёши катта ўйинчиларга эътибор қаратмаймиз, фақат ёшлар билан ишлаймиз. Академиямизда ёшлар кўп ва улар билан ишлаш мароқли бўляпти.
- Иқтидорли ёшларни кучли клублар чақирса қандай йўл тутасиз?
- Агар биздан кучли жамоалар таклиф билан чиқса ва футболчимиз ўша жамоада ўйин амалиётига эга бўлса, бундан фақат хурсанд бўламиз.
- Одатда футболчилар билан йил якунига қадар шартнома тузилади. Сизларда ҳам шунақами?
- Ҳа, шундай. Аксар ўйинчиларимиз 2007-2008 йилда туғилган. Ундан кичиклар ҳам бор. Бу ёшдагилар бу мавсум академиямиз битирувчилари ҳисобланади. Келаси йил яхши жамоалардан таклиф бўлса, буни албатта кўриб чиқамиз.
- Тезкор гол ҳақида фикрингиз?
- Ўша вазиятда хатолар бир-бирига уланиб кетди. Қанотдаги футболчиларимиз тайёр бўлмаган ҳолатда марказда ўйнашга ҳаракат қилишди. Натижада тўп йўқотдик ва рақиб ўйинчиси чиройли зарба билан гол урди. Барибир дарвозабонимиз ҳам позицион хатога йўл қўйди. Буни ўйиндан кейин гаплашдик.
- Захирадан тушганлар ўзларини кўрсата олди. Уларни кейинги ўйин асосий таркибда кўрамизми?
- Захирадан қўшилган икки футболчимиз асосий таркиб футболчиси ҳисобланади. Фақат ўйиндан олдин енгил жароҳат сабаб уларни захирага қўйдик. Ҳамма футболчиларга имконият берамиз. Иккинчи бўлимда асосий ўйинчилар майдонга тушгани сезилди. Август охирларида Осиё чемпионати саралаш босқичини бошлаймиз, шу вақтгача жароҳати бор футболчиларни даволаб майдонга қайтаришимиз керак бўлади.
- Рақамларга қарасак, жамоангиз урган голлар билан ўтказиб юборилган тўплар бир-бирига яқин экан.
- Тан олиш керак, биз ўз даражамиздан анча юқори Лигада ўйнаяпмиз. Бу йил Пролига жудаям зўр ўтяпти, мусобақа савияси анча кўтарилган. Шунча тур ўтибдики, биз ҳеч бир учрашувни осон ўтказмадик. Ҳар бир ўйин биз учун дарс бўляпти. Тўп билан бўлганда ҳужумкор футбол тарафдоримиз, ҳимоядаги хатолар эса тажриба камлиги билан боғлиқ. Биз ўз олдимизга қўйилган мақсадни эсдан чиқармаслигимиз керак. Муҳими, футболчилар кўзи ёниб майдонга тушиши шарт, қаердадир техник ё техник хатолар кузатилса, бунга кўз юмамиз. Агар кўзи ёнмаса, бунга чидай олмайман. Ҳозирча ҳеч кимга йирик ҳисобда мағлуб бўлмадик, бу ҳам қайсидир жиҳатдан бизни қониқтиряпти.
