65 ёшли мутахассис билан тузилган янги келишув 2032 йилгача мўлжалланган. Аввалги шартнома 2028 йилнинг ёзида ниҳоясига етарди. Қайд этилишича, Рафаэль Лоусан раислигидаги RFEF директорлар кенгаши де ла Фуэнтенинг шартномасини узайтириш қарорини бир овоздан маъқуллаган.
"Биз барқарорлик ва ишонч лойиҳасини изламоқдамиз. Бу таклиф Луис де ла Фуэнтега ҳамда у бошқараётган, бир неча йиллар ва муҳим мусобақаларга мўлжалланган спорт лойиҳасига бўлган ишончга асосланган. Гап терма жамоа тарихидаги энг кўп соврин ютиб олган мураббий ҳақида кетмоқда ва қадрдон уйимиздаги 14 йиллик фаолиятидан сўнг у RFEF'да узоқ давом этадиган келажакка тўла ҳақли", – дея Лоусаннинг сўзларини келтиради федерация матбуот хизмати.
Де ла Фуэнте Испания терма жамоасини 2022 йилдан буён бошқариб келмоқда. Унинг қўл остида миллий жамоа ЖЧ-2026’да ғалаба қозонди, 2024 йилда Европа чемпиони бўлди ҳамда 2022/23 йилги Миллатлар Лигаси бош совринини қўлга киритди.
Бунга қадар мутахассис 2018 йилдан 2022 йилгача Испания ёшлар терма жамоасида, 2013 йилдан 2018 йилгача эса 19 ёшгача бўлган футболчилардан иборат терма жамоада фаолият юритган.
