Бунда "Нефтчи" бош мураббийи Ислом Исмоилов иштирок этди.
- Ўйин ҳақида фикрингиз?
- Биринчи навбатда узоқ йўл босиб, бизни қўллаб-қувватлаш учун шу ерга келган мухлисларимизга миннатдорчилик билдираман. Энди ўйинга тўхталадиган бўлсак, оғир ўтиши маълум эди. Чунки "Бухоро" кучга таянган футбол ҳамда агрессив ўйин намойиш этишини билардик. Биз бу учрашувга етарли даражада ҳозирлик кўрдик. Афсуски, бир қатор вазиятлардан тўп кирита олмадик. Умуман олганда ёмон ҳаракат қилмадик ва бундан-да яхши ўйин кўрсата оламиз. Сифатли футбол учун майдон талаби ҳам жавоб бериши керак. Тезкор ўйин намойиш эта олмаганимиз сабаби майдон ҳолати билан боғлиқ. Охиригача курашдик ва рақибга ютқазмадик.
- "Нефтчи" бир қатор жамоалар билан ўйнаб кўрди. Бошқалар билан таққослаганда "Бухоро" қайси жиҳатлари билан сизга қийинчилик туғдирди?
- Сафарда тўп тепганимиз боис узун паслар орқали ўйнадик. Бу жабҳада "Бухоро" устунроқ деб ўйлайман, сабаби жамоа ўйин услуби кўпроқ курашларга қурилган. Бугун яккакурашлар кўп бўлди ва шу йўл билан "Бухоро" бошқаларга қараганда ажралиб турди дея оламан.
- Айтишларича, бизнинг Суперлигада интенсивлик йўқ экан. Бу борада сизнинг фикрингиз қандай?
- Интенсивлик бу - тез футбол ва доимий равишда тезкор ҳужумлар. Бу нарсалар бўлиши учун бир қатор омилларни санаб ўтиш керак бўлади. Фақат хоҳиш ёки гапиришнинг ўзи камлик қилади. Масалан, машинангиз тез юриши учун сифатли бензин қуйиш, сифатли шина тақиш, сифатли мотор бўлиши ва ҳоказолар талаб этилади. Футболда ҳам шундай, ҳамма нарса сифатли бўлиши керак. Бизнинг футболда интенсивлик бор, балки юқори эмасдир, лекин бор. Легионерларнинг бирданига ўйнаб кета олмаётгани ҳам интенсивлик туфайли. Кўпчилик бизга паст назар билан қарайди, аммо майдонга тушганда ўйнаш қийинлигини тушуниб етади.
- Жамоангизнинг етакчи футболчилари йўқлиги ўйинга таъсир қилдими?
- Ҳар бир футболчининг ўз ўрни бор ва ҳар бир футболчи биз учун қадрли. Бугунги кунда беш нафар футболчимиз терма жамоада, қўшимчасига Аброр Исмоилов жароҳат сабаб ўйнай олмади. Бу дегани 6 нафар асосий ўйинчимизсиз баҳсни ўтказдик. Лекин бизда бу асосий, бу захира деган тушунча йўқ. Жамоада соғлом рақобат бор. Бугун майдонга тушганлар йўқларнинг ўрнини билдирмади.
- "Нефтчи" учта фронтда жанг олиб боришга қанчалик тайёр?
- Биз навбати билан бўлажак учрашувга ҳозирлик кўрамиз. Ҳозирдан мен жамоамиз Элит ОЧЛга тайёр деб айта олмайман, чунки бунга ҳали вақт бор. Ҳар бир ўйинга босқичма-босқич ҳозирлик кўряпмиз.
