Ислом Исмоилов: "Ўйинлар орасидаги вақт қисқалиги сабаб, асосий урғуни тикланиш жараёнига бердик"

Саудия Арабистонига қарши ғалабали ўйиндан сўнг Ўзбекистон U-15 терма жамоаси бош мураббийи Ислом Исмоиловнинг фикрлари билан қизиқдик.

- Ўйин ҳақида

- Икки кун олдин БАА га қарши ўйин ўтказгандик. Ўйинлар орасидаги вақт қисқалиги сабаб, биз асосий урғуни тикланиш жараёнига бердик. Саудия Арабистони Осиёнинг топ жамоалари сафига киради. Шундан келиб чиқиб, биз йигитларга тартибли ҳимояни мустаҳкам ушлашни тушунтирдик. Футболчиларга раҳмат айтаман. Улар биз томонимиздан берилган кўрсатмаларни аъло даражада бажаришди. Ўйин иккала жамоа учун ҳам фойдали бўлди. 

- Рақиб ҳақида фикрингиз. Ўйин жуда қийин ўтди...

- Ҳа, ўйин оғир ўтди. Саудия Арабистони азалдан техникага асосланган футбол ўйнайди. Ҳозир гувоҳи бўлдикки, Саудия Арабистони жисмоний жиҳатдан ҳам анча ўсишга эришибди. Олдинги футболчилар бироз нимжонроқ, лекин техникаси юқори бўларди. Ҳозир эса жисмоний жиҳатдан улар анча кучайгани билиниб турибди. Шуни ҳисобига кўп якка курашларда рақибга ютқазиб қўйдик. Бироқ, позицион ҳимояланиш ва ҳужум қилишда футболчилар айтилган кўрсатмаларни бажарганликлари учун ғалаба қозонишни уддаладик.