U-23 Осиё Кубоги: юришимиз Ливандан бошланади. Рақиб ҳақида нималарни биламиз?

Ўзбекистон ёшлар футболи учун навбатдаги муҳим синов бошланмоқда. Саудия Арабистонида ўтаётган U-23 Осиё Кубогида Равшан Ҳайдаров бошчилигидаги Ўзбекистон U-21 терма жамоаси бугун илк учрашувини ўтказади. Мусобақадаги биринчи рақиб — Ливан U-23 терма жамоаси.

Қитъа миқёсидаги бундай турнирларда биринчи ўйин ҳар доим алоҳида аҳамиятга эга. Илк баҳс жамоанинг руҳий ҳолати, ишонч даражаси ва кейинги босқичлар учун йўналишни белгилаб беради. Шу боис Ливанга қарши учрашув оддий старт эмас, балки бутун мусобақадаги юришимиз учун муҳим пойдевор вазифасини ўтайди.

Ливан U-23: тарихий дебют ва катта иштиёқ

Ливан U-23 терма жамоаси ўз тарихида биринчи марта U-23 Осиё Кубоги финал босқичида иштирок этмоқда. Бу жамоа аввал ҳеч қачон мазкур ёш тоифасидаги қитъа чемпионатига йўл олмаган. Шу маънода, Ливан учун бу турнир — катта тажриба бўлиб хизмат қилиши шубҳасиз.

Дебютчи мақоми айни пайтда икки хил ҳолатни англатади: бир томондан — тажриба етишмаслиги, иккинчи томондан эса ҳеч қандай босимсиз, эркин ва хотиржамлик билан ўйнаш имконияти. Шу жиҳатдан Ливан жамоасини камситиш ёки фақат статистикага таяниш хато бўлиши мумкин.

Саралаш босқичи: барқарорлик ва характер

Ливан саралаш босқичида “F” гуруҳида иштирок этди. Рақиблар орасида Малайзия, Таиланд ва Мўғулистон бор эди. Натижалар Ливан жамоасининг барқарор ўйини ва курашувчан характерини яққол кўрсатди:

Малайзия — Ливан 0:1

Ливан — Таиланд 2:2

Ливан — Мўғулистон 3:0

Иккита ғалаба ва бир дуранг билан Ливан гуруҳда иккинчи ўринни эгаллади. Иккинчи ўрин соҳиблари орасида учинчи бўлиб финал босқичга чиққани ҳам жамоанинг етарлича рақобатбардош эканини англатади. Айниқса, Таиландга қарши ўйинда кўрсатилган характер ва ҳужумкорлик эътиборга лойиқ.

Легионерларга таянган таркиб

Ливан U-23 терма жамоаси таркибида 7 нафар легионер футболчи борлиги ҳам муҳим омил. Бу футболчилар турли мамлакатлар ва турли футбол мактабларида шаклланган:

Жад Смаира — "Акронас Онисилос" (Кипр)

Юсуф Эл Ҳажи — "СВ Гонсенхеим" (Германия)

Ходер Хаддур — "Жанубий Мелбурн" (Австралия)

Даниэль Истамбули — "Пионерс" (АҚШ)

Леонардо Шаҳин — "ИК Оддеволд" (Швеция)

Нур Аоуде — Окленд университети (АҚШ)

Антони Маасри — "Виллемомбле" (Франция)

Бу легионерлар жамоага жисмоний тайёргарлик, тактик интизом ва халқаро тажриба олиб киргани шубҳасиз. Айниқса, Европа ва Австралия чемпионатларида тўп тепаётган футболчилар ўйини қизиқ бўлади. 

Бош мураббий ҳақида

Ливан U-23 терма жамоасига Жамал Таҳа бош мураббийлик қилмоқда. У Ливан футболи учун мутлақо бегона шахс эмас. Аввал ҳам миллий терма жамоа, ҳам U-23 жамоаси билан ишлаган мутахассис сифатида мамлакат футболи ичидаги имкониятларни яхши билади. Бу эса жамоанинг тактик жиҳатдан анча йиғиқ ва интизомли ўйнашига замин яратади.

Ўзбекистон — Ливан: тарих биз томонда

Ўзбекистон ва Ливан ўртасида турли ёш тоифаларида ўтган ўйинлар тарихига назар ташласак, устунлик асосан бизнинг жамоалар томонида:

2023. Ўртоқлик турнири: Ўзбекистон U-14 — Ливан U-14 1:0

2018. Ўртоқлик учрашуви: Ўзбекистон — Ливан 0:0

2017. U-23 ОК саралаш: Ўзбекистон U-23 — Ливан U-23 3:1

2016. Ўртоқлик: Ўзбекистон — Ливан 2:0

2013. ЖЧ саралаши: Ўзбекистон — Ливан 1:0

2012. ЖЧ саралаши: Ливан — Ўзбекистон 1:1

2008. ЖЧ саралаши: Ўзбекистон — Ливан 3:0

2008. ЖЧ саралаши: Ливан — Ўзбекистон 0:1

Бу натижалар психологик жиҳатдан ҳам Ўзбекистон фойдасига ишлайди. Бироқ ҳар бир янги турнир — янги тарих эканини ҳам унутмаслик лозим.

Хулоса

Ливан U-23 терма жамоаси номига қараб содда рақибдек туюлиши мумкин, аммо фактлар бошқача манзарани кўрсатади. Илк бор иштирок этаётган бўлса-да, саралашда ишончли ўйин, легионерларга бой таркиб ва тажрибали мураббий жамоани жиддий рақибга айлантиради.

Шу билан бирга, Ўзбекистон ёшлар терма жамоаси ўз олдига қўйган мақсадлари, тажрибаси ва футбол мактаби билан бу баҳсда фаворит мақомида. Энг муҳими — илк ўйинда хотиржамлик, интизом ва ўз услубимизга содиқ қолиш.U-23 Осиё Кубогидаги юришимиз Ливандан бошланади. Илк қадам эса муваффақиятли чиқиши кейинги ўйинларга ҳам ўз таъсирини ўтказади. 

Маълумот учун, учрашув бугун Тошкент вақти билан 19:00да старт олади.