Манбага кўра, жамғарма тўртта мамлакат — Португалия, Бельгия, Нидерландия ва Швейцариядаги вариантларни кўриб чиқмоқда. Мақсад — "Интер"нинг ёш футболчиларини ривожлантириш ва уларнинг трансфер қийматини ошириш учун сателлит (фарм) тузилма яратиш.
Асосий эътибор олий дивизион клубига қаратилмоқда. Бу "Интер" футболчиларига бир эга тизими ичида қолган ҳолда хорижда мунтазам ўйин амалиётига эга бўлиш имконини беради. Ҳозирда Oaktree ўрганиш босқичида бўлиб, сотиб олиш учун аниқ бир клубни ҳали танлагани йўқ.
Лойиҳа бошқа йирик эгалар томонидан аллақачон қўлланилаётган моделни такрорлайди. City Football Group, Red Bull ва "Челси" турли мамлакатларда клублар тармоғини яратиб бўлган. Яқинда "Парма" эгалари бўлмиш Krause Group Португалияда фаолиятини кенгайтириб, "Каза Пия"ни сотиб олди. Айнан Лиссабоннинг ушбу клуби "Интер" ва Oaktree'ни қизиқтириши мумкин бўлган битим намунаси сифатида келтирилмоқда.
Манбанинг қайд этишича, жамғарма битимни жорий мавсум давомида якунлашга умид қилмоқда. Бу ҳолатда янги сателлит клуб 2027 йилги ёзги трансфер ойнасидан бошлаб "Интер" учун очиқ бўлади.
