Аввалроқ FRMF раҳбари Фаузи Лекжа Инфантинонинг жаҳон чемпионати тижорий ҳуқуқларидаги улушларни хусусий инвесторларга сотишни назарда тутувчи FIFA Forward Enterprise (FFE) лойиҳасини амалга оширишдан воз кечиш қарорини қўллаб-қувватлаган эди. Можаролар фонвида Инфантино босим остида қолди ва федерациялар унинг раҳбарлигига шубҳа билан қарамоқда. Ҳозирда у Марокаш пойтахтида бўлиб турибди ва турли мамлакатларни уни қўллаб-қувватлаши ҳақида баёнот беришга кўндиришга уринмоқда. Чоршанба куни эрталаб Жанни Рабатда ўз ходимларини фавқулодда йиғилишга чақирди. Таъкидланишича, у асосий тарафдорларидан бири ва 2034 йилги жаҳон чемпионати мезбони Саудия Арабистонининг сукут сақлаётганидан хавотирда. Марокаш ўн йил олдин сайланганидан бери Инфантинонинг энг содиқ тарафдори ҳисобланади. Ушбу мамлакатни кейинги жаҳон чемпионати мезбонларидан бирига айлантириш орқали у қўллаб-қувватлов учун миннатдорчилик билдиргани тахмин қилинмоқда. Қолаверса, The Times хабарига кўра, ФИФА раҳбари кўмак эвазига Испания, Португалия ва Марокаш мезбонлик қиладиган ЖЧ-2030 финали Мадриддаги "Сантьяго Бернабеу"да эмас, балки Касабланкада қурилаётган, 115 000 мухлисни сиғдирадиган янги "Хассан II" стадионида ўтказилишини ваъда қилган. Шу билан бирга, ФИФА президенти томонидан финал ўтказиладиган жой юзасидан қабул қилинган ҳар қандай қарор мажбурий кучга эга эмас ва агар Инфантино 2027 йилдаги сайловларда мағлуб бўлса, унинг вориси томонидан ўзгартирилиши мумкин.
