Илёс Зейтуллаев: "Аҳмадалиев бизда юз берган воқеалар туфайли ОКМКга қайтишни хоҳлаб қолди. Супергол урган Аҳмаджонов эса режа бўйича умуман ўйнамаслиги керак эди..."

– Ўйин ҳақида...

– Ниҳоят расмий ўйинлар бошланди, биз жуда узоқ кутдик, чунки барибир бу давр биз учун бироз нозик эди ва ҳозир ҳам бироз нозиклигича қолмоқда. Лекин мен, аслида, бу жамоани, йигитларни алоҳида эътироф этмоқчи эдим, чунки улар биринчи кундан, йиғинлардан то бугунги кунгача жуда кучли жамоавий руҳни, жипсликни кўрсатишди. Шунинг учун бу фақат бошланиши, уларга илтимосим, биз жуда камтарин бўлиб қолишимиз, кейинги ўйинга хотиржам тайёрланишимиз керак, чунки бизни жуда кучли рақиб кутмоқда. Шу сабабли ҳозир тайёрланиш ва кейинги турга ҳозирлик кўриш керак, чунки биз ҳали бошланишидамиз.

– “Бунёдкор” клубининг бош ҳомийси молиялаштиришни тўхтатгани ҳақидаги хабарлардан кўпчилик хабардор бўлди. Бу клубнинг ўша мавсумдаги режаларига таъсир қилдими, яъни юқори ўринлар учун бўлган курашга, режаларга таъсир ўтказдими?

– Албатта, барибир, ҳаммамиз инсонмиз. Гарчи биз профессионаллар бўлсак-да, лекин барибир бу психологияга, албатта, кундалик ҳаётга бироз таъсир қилади, чунки йигитлар барибир шу билан яшайди. Бу бизнинг касбимиз. Лекин, бошқа томондан, биз бу ҳақда тез-тез гаплашамиз, бу давр ҳар қандай жамоада бўлиши мумкин. Шунинг учун, менимча, биз буни муносиб ўтказяпмиз ва Худо хоҳласа, яқин келажакда ҳаммаси изига тушиб кетади, чунки бу барибир ўзбек футболимиз учун жуда яхши бўлар эди. Шу сабабли биз ишонамиз, бизда ишонч бор, ҳаммаси яхши бўлади.

– “Бунёдкор” ўртоқлик ўйинларига назар ташладим, тўққизта ўйинда 16 та тўп ўтказиб юборган экан. Бу ҳимоядаги ечимлар тўлиқ бартараф этилди, деб ўйлайсизми?

– Кўп гол ўтказиб юборганмиз... Ҳа, назорат ўйинларида. Шунинг учун ҳам улар назорат ўйинлари деб аталади. Яъни ўтган йили кам гол ўтказиб юборгандик, лекин бу йил биз баъзи бир ўзгаришлар қилганимиз учун шундай бўлди, бу ўйинчиларнинг ўзаро тушунишига таъсир қилади. Шунинг учун қаердадир гол ўтказиб юбордик. Лекин шуни таъкидлаш керакки, бу йил ўтган йилгидан кучлироқ спарринг-рақибларни танладик, шунинг учун бу ҳам таъсир қилди. Лекин бу ритмни, интенсивликни оширди. Лекин Худога шукур, бугун "ноль"га ўйнадик, йигитлар ҳимояда яхши ишлашди, бу расмий ўйин. Назорат ўйинлари айнан шунинг учун керак.

– Мавсумнинг бошланиши ва биринчи ғалаба билан табриклаймиз. Одатдагидек, бу мавзу иккинчи планга тушмаяпти — футболдан ташқари баъзи омиллар чемпионат олдидан ўйинга таъсир қилаётгани. Бугун финал ҳуштагидан сўнг қандай ҳис-туйғуларни бошдан кечирдингиз? Албатта, хурсандчилик тушунарли, лекин бундан ташқари яна нималар бўлди, чунки мавсумга тайёргарликдан ташқари, жамоани сиз аниқ хавотир олаётган бошқа омиллар ҳам ўраб турибди.

– Мен йигитларга доим бир нарсани айтаман: биз ташқи омилларни назорат қила олмаймиз ёки ўзгартира олмаймиз. Иложимиз йўқ. Биз стандартларга тайёрлана оламиз, таркибни қўя оламиз, жисмоний, тактик, психологик жиҳатдан тайёрлана оламиз. Бу бизга боғлиқ. Биз назорат қила оладиган нарса — ҳар куни майдонга чиқиш, базага келиш, ҳозир бизда мавжуд бўлган қандайдир қийинчиликларга дуч келиш, лекин вазиятни қандай яхшилаш ҳақида ўйлаш. Агар қандайдир ташқи омиллар ҳақида ўйлайдиган бўлсак, уларга боғлиқ эмасмиз. Лекин яна такрорлайман, мен ишонаман ва аминманки, ҳаммаси ўз жойига тушади, чунки "Бунёдкор" тарихга эга клуб, билмадим, бунга ишонгим келади.

– Аввалига Дилшод Аҳмадалиев “Бунёдкор” билан шартнома имзолади. Кейинчалик “Бунёдкор” билан йиғинларда иштирок этди ва охир-оқибат ОКМК жамоасига яна қайтди ва биринчи турда “Бунёдкор”га қарши ўйнади. Умуман, унинг келиб-кетгани ҳақида ва унинг кетгани жамоага қанчалик таъсир қилди? Чунки ўртоқлик ўйинларида ҳам фақат Аҳмадалиев қанотда кўпроқ ўйнаётган эди.

– Эсимда, қаердадир айтган эдим, мен шахсан Дилшоднинг танловини ҳурмат қиламан. У бизга келганда хурсанд эди. Аммо бизда юз берган воқеалар туфайли у шунчаки ОКМКга қайтишни хоҳлаб қолди. Бизнинг ОКМК билан, Миржалол Қосимов билан муносабатларимиз жуда яхши. Мен унинг учун шундай қилиши тўғри бўлади деб ўйладим. Эркак киши сифатида, балки унинг оиласи бордир. Шунинг учун биз унинг фикрини инобатга олдик ва бу танловни мен муҳокама қилмайман. Бундай танловни муҳокама қилиш учун мен кимман? Агар у ўзини ОКМКда қулай ҳис қилса, биз унга тўсқинлик қилмаслигимиз керак, шунинг учун у яхши чемпионат ўтказсин, бу йил ОКМКга ёрдам берсин. Шунинг учун муносабатларимиз яхши сақланиб қолди ва ҳаммаси аъло бўлди. Айтганча, у яхши йиғинларни ўтказди, яхши тайёрланди.

– Унинг кетиб қолиши режаларга қанчалик таъсир қилди?

– Таъсир қилмади. Биласизми, биз унга ўрганиб қолгандик, у ҳам қандай ўйнашни хоҳлаётганимизни тушуниб олганди, ҳодиса бироз таъсир қилди, чунки у барча назорат ўйинларида ўйнади. Агар пайқаган бўлсангиз, бугун унинг позициясида Азиз Тўлқинбеков ўйнади, унинг ўрнини яхши эгаллади. Мослашди. Бу ёш футболчилар учун катта витрина. Лекин Азизни майдон марказига қўйганимиздан сўнг, ОКМКда ҳам ўйнаган Сардор Раҳмоновни, жуда яхши ҳимоячини майдонга туширдик. Менимча, нимаики бўлмасин, ҳаммаси яхшиликка.

– Шогирдларингиз биринчи бўлимда агрессив ўйин намойиш этишди ва уч марта сариқ карточка билан жазоланди. Балки бу агрессия ўтган мавсумдаги 1:5 ҳисобидаги мағлубият таъсиридир. Огоҳлантиришлар сизни иккинчи бўлимда эҳтиёткор бўлишга ундадими?

– Ҳа. Ўтган йилги ўйин ҳақида ҳам гаплашдик, лекин бу ўтмишда қолди, бу — тарих. Бундай ўйинлар бўлиб туради. Ёдингизда бўлса, ўтган йили ОКМК ҳисобда олдинга чиқиб олганди. Кейин биз ҳисобни 1:1 кўринишига келтирганмиз ва кичик бир хатога йўл қўйилганди, бу эса жамоани психологик жиҳатдан синдириб қўйганди. Шунинг учун бундай ўйинлар ҳамма жойда учрайди. Лекин, менимча, биз бу босқичдан ўтдик. Бугун эса Абдумавлонни алоҳида таъкидлаб ўтмоқчиман. Чунки у айнан ОКМКга қарши ўйинда хатога йўл қўйганди. Шунга қарамай, бугун у жуда жасоратли ўйнади, баракалла, ишончли ҳимояланди.

– Наримон Аҳмаджонов бугун ажойиб гол урди, лекин ўша чиройли гол уришига қарамай, икки-уч дақиқадан сўнг захирага олдингиз. Бунинг сабаби нима?

– Наримоннинг юраги катта. Катта юрак ва катта ўпка. У йиғинларни энг яхши ўтказганлардан бири. Бугун, биласизми, у умуман ўйнамаслиги керак эди, чунки бизнинг таркибимиз ёш. Лекин унинг ишга бўлган муносабати, йиғинлардаги муносабати... У бирорта ҳам машғулотни қолдирмади, интенсив ишлади. Бугун эрталаб уйғонганимда, у асосий таркибда ўйнашга лойиқ деб ўйладим. Худо уни қўллади. У яхши узатма амалга оширган эди, лекин тўп дарвозага кириб кетди. Ҳазил. Лекин у жуда яхши ўйинчи, уни кузатиш керак, чунки у ўйинчи сифатида жуда ақлли ва техник жиҳатдан жуда кучли.

– Нега уни алмаштирдингиз?

– Чунки унинг ўпкаси катта, кўп югурди. У юклама туфайли чарчади. Шунинг учун уни алмаштирдик.