– Бугунги ўйинга баҳонгиз қандай?
– Бугунги дуранг билан футболчиларни табриклайман. Бу ўйинга келадиган бўлсак, асосий мақсадимиз – Пролигадан Суперлигага чиқиш. Охирги ўйинимиздан кейин жуда қаттиқ ранжиган эдик. Тўққиз нафар футболчимизга дам берган эдик ва ўйнамаётган футболчиларга ўйин амалиёти беришни режалаштирдик. Уларга 3-4 кун олдин: "Бу учта ўйин орқали Пролига ўйинларига тайёргарлик кўрамиз", – деб таъкидлаган эдим. Чунки бизнинг мақсадимиз – Суперлигага чиқиш.
Барибир, кубокда ҳам, ҳар бир ўйинда ҳар бир мураббий, ҳар бир футболчи ғалаба қозонишни хоҳлайди. Йигитларни табриклайман. Бугун ўйин амалиёти кам бўлган йигитлар майдонга тушиб, ўзларини кўрсатишди. Менимча, улар бугунги ўйинга лойиқ эди. Шундай ўйнашда давом этишса, асосий таркибдаги футболчилар учун ҳам жиддий рақобат пайдо бўлади. Мен доим бор жонини бериб ўйнайдиган футболчиларни майдонга тушираман. Охирги ўйинда футболчиларимизнинг ҳаракати менга ёқмаган эди: майдонни баҳона қилишдими, об-ҳавонинг иссиқлигини баҳона қилишдими, хуллас, ўйинимиз ўхшамади. Нима бўлганда ҳам, бугунги ўйин ва қўлга киритилган бир очко билан йигитларни табриклайман.
– Тўққизта етакчи ўйинчини туширмаган мураббий жамоага қандай вазифа қўйиши мумкин? Бу барибир қизиқ-да...
– Юқорида таъкидлаб ўтганимдек, мен бу 9 нафар футболчига охирги ўйинда ютқазгани учун эмас, балки тиғиз тақвим ("боксинг-дэй") сабабли – 35 кун ичида 7 та ўйин ўтказганимиз учун дам бердим. Аҳамият берсангиз, деярли битта таркиб билан ўйнаб келдик. Шунинг учун уларга дам берилди. Ҳозирги 12 та футболчида етарли ўйин амалиёти йўқлиги сабабли, мана шу учта ўйинда уларнинг хизматидан фойдаланамиз. Агар ўзларини кўрсатишса, майнинг 20-санасида охирги ўйинимиз бўлади. 30-санадаги ўйинларга эса, жисмоний ҳолати яхши, тезлиги бор, тайёр йигитларни "Каттақўрғон" билан бўладиган учрашувга тайёрлайман. Яна бир бор айтаман: мен кубокдаги қайсидир рақибга эмас, балки айнан "Каттақўрғон" жамоасига қарши ўйинга тайёргарлик кўряпман. Биз учун энг муҳими – шу ўйин. Чунки гуруҳдан биринчи ўринни олиб чиқишимиз керак.
– Демак, стратегия фақат ОКМК жамоасига қарши эмас, қолган иккита ўйинда ҳам худди шундай давом этадими?
– Деярли шундай бўлади. Асосий футболчиларимизга уч кунлик таътил берган эдик, бугундан кейин уларни ҳам тайёрлашни бошлаймиз. Лекин захирадан тушган футболчиларга раҳмат айтаман. Айниқса, Бразилиядан келган, энди адаптация жараёнидан ўтаётган ҳужумчимиз "Олимпик-MobiUz" билан баҳсда жарима зарбалари ишлади, хавфли вазиятлар яратди. Жароҳат олиб сафдан чиққан эди, мана энди ўзига келиб, яна ўзини кўрсатиб турибди. Менимча, ОКМК охирги пайтларда бироз бўшашди. Улар Суперлигада чемпионлик учун курашадиган жамоалар қаторига киради. Шундай бўлса-да, бир очко олишга муваффақ бўлдик.
– Иштаҳа овқат вақтида келади, дейилади. Бугун мағлубиятга учраган тақдирингизда ҳам ҳеч ким эътироз билдирмаслиги мумкин эди, чунки бунинг объектив сабаблари бор. Бироқ дуранг натижа жамоада кейинги босқичга чиқиш имкониятига бўлган умидни уйғотиб юбордими?
– Бу гапингизга шундай жавоб бераман: сафардаги еттинчи турдаги мағлубиятимиздан сўнг, уч кун олдин раҳбарлар чақиртиришди. Улар жуда қаттиқ танқид қилишди. Лекин бу ўйинга қандай таркиб билан тушишимни, қандай тайёргарлик кўришимни, ой охирида яна учта ўйинимиз борлигини ва ундан кейинги танаффусга қандай стратегия тузганимни раҳбарлар билишарди. Бу футболчилар билан ютсак ҳам, ютқазсак ҳам, уларга фарқи йўқ эди. Чунки мен бу учта ўйин, айниқса, биринчи давранинг охирги учта учрашуви биз учун қанчалик муҳимлиги ҳақида ҳисобот берган эдим. Биз ҳал қилувчи ўйинларни асосий рақобатчиларимизга қарши ўтказамиз: булар "Каттақўрғон", "Шўртан" ва "ФарДУ" жамоаларидир.
– Лекин гуруҳдаги қолган учрашувларда ижобий натижа қайд этишдан ҳеч ким хафа бўлмаса керак?
– Албатта, ҳеч ким хафа бўлмайди. Барибир раҳбариятга ҳам натижа керак. Биз мураббийларга ҳам натижа муҳим.
– Ҳозир асосан ўйин амалиётига кам эга бўлган футболчилар майдонга туширилганини айтиб ўтдингиз. Бугунги учрашувдан келиб чиқиб айтсангиз, айнан қайси футболчиларнинг ҳаракатидан тўлиқ қониқиш ҳосил қилдингиз ва кимлар умидингизни оқлади?
– Ҳимоямиз 3 та гол ўтказиб юборди, шунинг учун ҳимоячиларнинг ўйинидан қониқиш ҳосил қилмадим. Лекин баъзи ҳаракатлар менда ижобий таассурот қолдирди. Олдинги чизиқда ўйнаган Шерзод Комиловдан бундан кўпроғини кутган эдим. У билан ҳали анча жиддий суҳбатлашамиз, чунки келаси йили Суперлигада ўйнаши учун мен талаб қилаётган нарсаларни бажармаса, жамоада қолиши қийин бўлади. Бугун ҳужумчимиз, бразилиялик Максвел ўзини яхши кўрсатди. Унинг ҳаракатлари менга ёқди.
