Илҳом Мўминжонов: "Ўтган йили осмонда эдик, бу йил пастда юрибмиз"

Ўйин ҳақида

- Бугун кўрсатган ўйинимиз учун йигитларга ўз миннатдорчилигимни билдираман. Сабаби захира ўриндиғимиз тор, биз дастлаб Суннатилла Абдуллажоновни, ўйиннинг сўнги дақиқаларида Ойбек Қиличевни майдонга туширдик. Йигитлар майдонда борларини бериб ҳаракат қилишди. 

Жароҳат олган футболчилар тез орада сафга қўшилиши кутилаяпти. Бугун ютсак бўларди, шундай бўлса ҳам қўлга киритилган бир очко билан барчани табриклайман. Иккита голли вазиятлардан фойдалана олмадик. "Олимпик"да деярли хавфли вазиятлар юзага келмади. Биз тезроқ бу чуқурликдан чиқиб кетишга ҳаракат қилаяпмиз.

- Ўзгаришларни кеч амалга оширганингизни сабаби нима?

- Захира ўриндиғимиз тор бўлгани сабабли ўйин темпига қараб ўзгаришларни амалга оширдик.

- Шуҳратилло Раҳмонов ва Шодиёр Ҳожиматовлар жамоада олиб қолинганми?

- Ҳа, улар биз билан бирга. Шодиёр Ҳожиматовни олиб қолдик, иккинчи даврадан жамоамизга ёрдами тегишига ишонаман.

- Шарич нега майдонга туширилмади?

- У ҳозир талабга жавоб бермаётган ҳужумчи ҳисобланади. Шу сабаб майдонга туширмадик. Суперлигада осон ўйин бўлмайди, секин-секин ўзимизга келиб оламиз деган умиддаман. Мухлисларимиздан яна бир бор узр сўрайман. Ўтган мавсум осмонда эдик, бу йил пастга тушиб қолдик. Жамоа таркиби янгидан шакллантирилди. Яхши футболчини жамоага олиб келиш қийин, лекин "Нефтчи"ни кўтараман деб келган ва жон куйдириб ўйнаётган футболчиларга миннатдорчилик билдираман. Ҳали ҳаммаси олдинда. Эртадан машғулотларга киришамиз.

- "Олимпик" билан жамоа биринчи бўлимда чўчиб ўйнагандек туюлди, буни қандай изоҳлайсиз?

- "Олимпик" бу ўша ўтган мавсум Про-лигада ўйнаган жамоа. "Насаф"дан ва "Динамо"дан футболчилар таркиб тўлдирилган. Ўтган мавсум улар билан ўйнаганмиз, дуранг натижа, ғалаба ва мағлубиятлар бўлган. Бу йил яна кўришдик. 

Биринчи бўлимда рақиб тезкорлик кўрсатди, бизга босим уюштирди. "Олимпик" таркибини ёш футболчилар ташкил этади, лекин ҳар бир чизиқда энг яхшилар жам бўлган. Меҳмонларда голли вазиятлар деярли бўлмади, улар бугунги дуранг натижада хурсанд бўлишди деб ўйлайман. Биз аксинча икки очко йўқотдик. 

- "Навбаҳор" билан ўйин ҳақида фикрлангиз қандай?

- Ҳозир ҳеч бир ўйин осон ўтмайди. Бу ўйинга қадар Сирожиддин Қўзиев сафга қайтишига умид қилаяпмиз. Машғулотларда иштирок этмоқда. Лутфулла Тўраев ҳам тез орада машғулотларга киришади. 

- Қайдномага ёш футболчилар ҳам киритилмоқда. Ўтган турда Фахриддин Муҳаммадов 10 дақиқа атрофида ўйнади. Уни бугун ҳам майдонга тушириш мумкинмиди?

- Ёш футболчиларимиз ҳозир 18 ёшда. Уларнинг келажаги бор. Йил якунига қадар Фахриддин ва бошқа ёш футболчиларга имкон берамиз.