Эрон МТЖ ёрдамчи мураббийи Антонио Маниконе: "Жаҳонбахшнинг йўқлиги терма жамоа режаларига ҳеч қандай салбий таъсир ўтказмади"

Унда Эрон термаси ёрдамчи мураббийи Антонио Маниконе ва ярим ҳимоячи Саид Иззатуллоҳи қатнашишди. 

"Бош мураббий Амир Галенои бироз бетоб бўлиб қолдилар, шу сабаб бугун мен саволларингизга жавоб бераман. Ўйин ҳақида гапирадиган бўлсам, эртага қизиқарли учрашув бўлиши аниқ. Ўзбекистон терма жамоаси билан июнь ойида тўқнаш келган эдик, эртага ҳам бизни жиддий учрашув кутиб турибди", – деди Маниконе.

"Бош мураббийимиз бетоб бўлишларига қарамай, улар биз билан Ўзбекистонга келди. Мураббийимизга соғлиқ тилайман. Саралаш босқичларида бирламчи ўйинлар жуда қийин кечади. Гонконгга қарши қийин учрашувни ўтказдик. Эртага Ўзбекистонга қарши ҳам қийин учрашув кутиб турибди", – деди Иззатуллоҳи.

- Тўрт ой олдин Ўзбекистон терма жамоасига қарши ўйнаган эдингиз. Мана шу қисқа вақт ичида Ўзбекистон терма жамоасида нималар ўзгарган деб ўйлайсиз?

- Ўша учрашув менга ёққан эди. Ўзбекистон терма жамоаси Осиёда энг кучлилардан бири ҳисобланади. Бош мураббийингиз словениялик мутахассис (Сречко Катанец – таҳр.) жуда тажрибали мураббий. Умид қиламанки, эртага қизиқарли учрашув бўлади.

- Эрон терма жамоаси таркибда жуда кучли футболчилар бўлишига қарамай, кўпинча иккинчи рақам бўлиб ўйнайди. Бунга сабаб нима деб ўйлайсиз?

- Фикрингизга қўшилмайман. Сўнгги учрашувларимизни кўриб чиқишингизни тавсия қиламан. Футболда фақат бир тактикада ўйнаб бўлмайди. Биз услубларни аралаштиришга, "микс" қилишга ҳаракат қиламиз. Вақти келса ҳужумга ўтамиз, керакли вақтда химояланамиз.

- Футболчига савол. Сиз "Ростов" жамоасида Элдор Шомуродов билан бирга ўйнагансиз. Унга қандай таъриф бера оласиз?

- Элдор билан бирга ўйнашга сазовор бўлганман. Уни қаттиқ ҳурмат қиламан. У катта тажрибага эга футболчи ва бутун Осиёда уни танишади.

- Бош мураббий бетоб, деб айтдингиз. Жаноб Галенои эртанги учрашувда иштирок этадими?

- Ҳа. Ҳаммаси жойида бош мураббий эртанги учрашувда иштирок этади

- Асосий таркиб футболчиси Алиризо Жаҳонбахшнинг жароҳати терма жамоа режаларига қанчалик таъсир ўтказди?

- Ҳар бир футболчининг ўз ўрни бор, аммо терма жамоа режаларига ҳеч қандай салбий таъсир ўтказмади.

- Футболчига савол. Эрон терма жамоаси футболчилари ва мураббийлари ҳар доим ўзбек футболи ҳақида яхши фикрлар билдиришади ва бизни кучли терма жамоалар сафига қўшишади. Лекин Эрон терма жамоаси ҳар доим бизни мағлуб этиб келган, масалан, яқинда бўлиб ўтган учрашувда ҳам "Сепахон" жамоаси ўзбек клубини 9:0 ҳисобида мағлуб этди. Бу ўртамиздаги фарқ катталигидан далолат, менимча. Эронликлар ўзбек футболини ҳақиқатан ҳам кучли деб ҳисоблашадими ёки бу оддий мақтовми?

- Биз футболчилар майдонда рақибмиз. Майдонда жанг қиламиз – ўзбек футболини кучли деб ҳисоблаймиз. Ўзбек футболида бўлаётган ўзгаришлар эътирофга лойиқ. Терма жамоадаги кўпгина футболчиларингиз Европа майдонларида тўп тепишади. Бу ҳам ўзбек футболининг яхши даражада эканлигидан далолат беради. Ўзбекистон миллий терма жамоаси бизнинг кам сонли асосий рақибларимиздан бири.