Голкипернинг айтишича, АҚШ ва Англиядаги барча мутахассислар унга жарроҳлик амалиётини тавсия қилган. Бироқ Мартинес мундиални ўтказиб юбормаслик учун операциядан воз кечиб, операциясиз даволаниш йўлини танлаган.
"Қўлим ҳали ҳам ҳар куни оғрийди. Бу оғриқ бўлишини аввалдан билардим. Мен операциядан қочдим. АҚШ ва Англияда маслаҳатлашган барча шифокорлар операция қилиш кераклигини айтди. Акс ҳолда ўйнай олмаслигимни таъкидлашди.
Европа лигаси финалида бармоғим синган ҳолда ғалаба қозонганингдан кейин сенга операция қилишинг кераклиги, Жаҳон чемпионатининг гуруҳ босқичини ўтказиб юборишинг мумкинлигини айтишса, инсоннинг хаёлига турли ўйлар келади.
Менинг тайёргарлигим бошқаларникидан бутунлай фарқ қилди. Илк ўйиндан икки кун аввалгача фақат бир қўлим билан тўпга ташланардим. Худди иккинчи қўлим йўқдек эди.
Гуруҳ босқичи давомида жамоа билан тўлиқ машғулот ўтказа олмадим. Бу менга жуда оғир таъсир қилди, чунки мен машғулот қилишни жуда яхши кўраман. Аммо 1/8 ёки чорак финалдан бошлаб, Мисрга қарши ўйиндан кейин одатдагидек машғулот ўтказдим ва ҳозир ўзимни анча яхши ҳис қилаяпман", - деди Мартинес.
Эслатиб ўтамиз, Эмилиано Мартинес ЖЧ–2026 давомида Аргентина терма жамоасининг асосий дарвозабони сифатида майдонга тушди ва жамоанинг финалга чиқишида муҳим ҳисса қўшди. У аввалроқ ҳам 2022 йилги Жаҳон чемпионатида кўрсатган ишончли ўйини билан Аргентина чемпионлигига катта ҳисса қўшган эди.
