Эмилиан Карас:
Чемпионлар лигаси Тошкентга қайтганидан хурсандмиз. Эртага ушбу кучли рақибни кутиб олаётганимиздан мамнунмиз. Мухлислар келиб, бизни янада кўпроқ қўллаб-қувватлайди, деб умид қиламиз. Рақиб жамоа таркибида Европа ва Америкадан катта маблағ эвазига харид қилинган юқори савияли футболчилар жамланган. Уларда "Ливерпуль" ва "Селтик" каби клубларда ишлаган, катта номга эга жуда яхши мураббий бор. Яъни, жамоа жуда рақобатбардош. Ҳозирги босқичда улар иккинчи ўринда бормоқда ва менимча, пешқадам "Ал-Ҳилол" билан биргаликда чемпионатдаги энг яхши ўйинни кўрсатмоқда. Шундай бўлса-да, биз рақибни кутяпмиз ва эртанги ўйинга тайёргарлик кўряпмиз. Яхши ўйин кўрсатишга, энг муҳими, ижобий натижага эришишга ҳаракат қиламиз. Шундай ажойиб об-ҳавода барчани футболга, эртанги ўйинга йигитларимизни қўллаб-қувватлаш учун таклиф қиламиз.
Башар Ресан:
Барчага ассалому алайкум. Албатта, қийин ўйин бўлади. Рақибимиз сўнгги икки мавсумда Саудия Арабистонининг энг яхши жамоаларидан бири бўлиб келмоқда. Биз ўтган куни чемпионат доирасида битта ўйин ўтказдик, улар ҳам худди шундай, ўтган куни ўйнашди. Ҳозир биз тайёрмиз, чунки биласиз, миллий терма жамоаларда етти нафар футболчимиз бор, улар Ўзбекистонга, Ироққа ва бошқа турли мамлакатларга сафар қилишди. Улар эндигина қайтиб келишди ва кўп вақтларини тикланишга сарфлашди. Биз ушбу ўйинга яхши тайёргарлик кўряпмиз ва эртага мухлисларимизни кутиб қоламиз. Иншааллоҳ, яхши натижага эришамиз. Барча бу ўйиннинг қийин ўтишини билади ва унга тайёр.
– Жамоа Чемпионлар лигасининг 1-турида сафарда ўйнади ва қайсидир маънода режалари ўхшади, ўзига керакли натижага эришилди. 2-турда ҳам жиддий рақиб. Олдинги рақиб ва ҳозиргисининг қайси жиҳатлари фарқ қилишини сездингиз ва бунга жамоа тайёрми?
– Ўйинга бўлган ёндашувлар бир-бирига ўхшамайди. Биз ўз мухлисларимиз қаршисида, ўз уйимизда ўйнаяпмиз. Олдинги рақибнинг ўз муаммолари бор эди. Ҳозирги рақибимиз эса жуда яхши ҳолатда, кетма-кет ғалабаларга эришди ва рақибларидан устунлик қилмоқда. Улар жуда яхши кўринишга эга. Айтишим мумкинки, ҳозирги рақибимиз энг яхши ўйин кўрсатаётган жамоалардан бири ҳисобланади. Улар олдинги рақибимиздан фарқли ўлароқ, бошқача схемада ҳаракат қилишади ва уларда кўпроқ бирга ўйнаб шаклланган, уйғунлашган таркиб мавжуд. Аммо бизнинг ҳам эртанги ўйин учун ўз режамиз бор ва ижобий натижага эришишга ҳаракат қиламиз.
– Чемпионат ўйинларида Санжар Қувватов мунтазам асосий таркибда майдонга тушаётган бўлса-да, ОЧЛ 1-турида Владимир Назаров майдонда эди ва ўтказиб юборилган голда қисман унинг ҳам айби бор эди. Ўша ўйинда Назаровни танлашингизга нима сабаб бўлди ва бўлажак ўйинда ҳам уни асосийда кўришимиз мумкинми?
– Бизда иккита кучли, тенг кучга эга дарвозабон бор. Бу жуда яхши ҳолат, чунки уларнинг ўсишига ва ўзаро рақобатига ёрдам беради. Иккаласи ҳам эртанги ўйинга тайёргарлик кўрмоқда. Эртага ким майдонга тушишини ўйиндан олдин ҳал қиламиз. Такрорлайман, бизда иккита ажойиб ва тенг кучли дарвозабон мавжуд, шу боис дарвозамизни ким қўриқлаши биз учун муаммо эмас.
– Рақибнинг қайси жиҳатлари сизни кўпроқ хавотирга солмоқда ва таҳлил давомида қандай заиф нуқталарини кўрдингиз?
– Ҳар бир жамоанинг ўз кучли ва заиф томонлари бўлади. Ҳозир бирор нарсага алоҳида урғу бермоқчи эмасман, бу ҳақда ўйиндан кейин гапиришни афзал кўраман. Ўйинга яхши тайёргарлик кўриш ва ҳар бир ўйинчи майдонда нима қилиши кераклигини аниқ билиши шарт. Жамоа ҳужумга эътибор қаратади, уларда яхши ҳужумкор футболчилар бор. Ҳатто ҳимоячилари ҳам ҳужумга жуда яхши қўшилади. Қолганини эртага ўйиндан сўнг муҳокама қиламиз.
– Саволим Башар Ресанга. Сўнгги пайтларда собиқ клубингиз "Персеполис"га қайтишингиз ҳақида кўплаб хабарлар тарқалмоқда. Бу қанчалик ҳақиқатга яқин ва келажагингиз борасида қарор қабул қилдингизми?
Башар Ресан:
Йўқ, ҳозир бор эътиборимни фақат клубимга қаратганман, чунки ҳали шартномам бор. Жамоамиз билан Ўзбекистон чемпионлиги учун курашяпмиз ва бунга жуда яқинмиз. Шунингдек, эртага Чемпионлар лигасида ҳам ўйинимиз бор. Биз фақат машғулотларга диққатимизни жамлаганмиз. Булар шунчаки хабарлар ва бундай гаплар турли давлатлардан чиқиши табиий ҳол, чунки биласиз, шартномам декабрь ойида якунига етади. Кўплаб клублардан таклифлар тушиши одатий ҳолат, лекин мен буларни бир четга суриб, бор диққатимни жамоамга ёрдам беришга қаратганман. Чунки биз бу мавсумда ҳам ўз ўрнимизни сақлаб қолишимиз керак, Ўзбекистонда энг яхши ўрин ва энг яхши ҳолатда бўлишга лойиқмиз – ахир биз "Пахтакор"миз. Жамоам ва дўстларим учун бор кучимни беришим керак. Булар эса шунчаки оддий янгиликлар – шартномаси якунланаётган ҳар қандай футболчи нафақат "Персеполис"дан, балки турли давлатлардан таклифлар олиши табиий. Бу мавзуда эса, иншааллоҳ, кейинроқ яна гаплашамиз.
– "Динамо Киев" штабида бўлганингизда "Пахтакор"га қарши учта назорат ўйини ўтказгансиз. Ўша пайтда клуб ҳақидаги тасаввурингиз билан бугун ичкаридан кўраётганингиз ўртасида қандай фарқ бор?
Эмилиан Карас:
– Орадан анча вақт ўтди. Умуман олганда, йиғинлардаги ўртоқлик ўйинларини расмий учрашувлар билан солиштириб бўлмайди. Биз Туркияда айнан шундай назорат ўйинларида тўқнаш келгандик. Жамоалар бундай пайтда доим юкламалар остида ўйнайди ва максимал имкониятларини кўрсата олмайди. Лекин "Динамо Киев"нинг собиқ буюк ўйинчиси Максим Шацких билан кўришиш жуда ёқимли эди. "Пахтакор" доимо кучли қаршилик кўрсатарди, чунки улар учун "Динамо Киев"га қарши ўйнаш принципиал аҳамиятга эга эди. Бу ўйинлар хотирамда муҳрланиб қолган. Бироқ яна қайтариб айтаман, назорат учрашувларини расмий ўйинлар билан таққослаб бўлмайди. Бу жамоалар учун яхши тайёргарлик вазифасини ўтаб берган эди холос.
