ЕЧЛ плей-оффида қўшимча таймлардан воз кечилади, дастлабки 8 ўринни эгаллаганлар жавоб учрашувларини уйида қабул қилади

Режалаштирилган ўзгаришларга кўра, плей-офф ўйинларида қўшимча вақт бўлмайди, дуранг қайд этилган тақдирда жамоалар дарҳол пенальтилар сериясига ўтади.

Қолаверса, турнир жадвалида кучли 8 ликка кирганлар чорак финал ва ярим финалдаги жавоб учрашувларини ўз уйларида ўтказишади.

Шунингдек, ўзгаришлар кучга кирса, бир мамлакат жамоалари чорак финалгача ўзаро ўйнамайди.

Бу мавсум Чемпионлар Лигаси плей-офф ўйинларида 2 марта экстра таймларга мурожаат қилинди ва уларда бирорта гол урилмади, ҳар бир дуэль натижасини пенальтилар серияси ҳал қилди. Масалан, ПСЖ "Ливерпул"ни пенальтилар сериясида 4:1 ҳисобида мағлуб этди (умумий ҳисоб 1:1), "Мадрид дербиси"да "Реал" "Атлетико"ни 3:2 ҳисобида мағлуб этди (умумий ҳисоб 2:2).

Шу билан бирга, гуруҳ босқичи якунига кўра кучли 8 ликка кирган "Арсенал" ва "Барселона" чорак финал ва ярим финалдаги биринчи ўйинларини уйда, жавоб учрашувларини эса меҳмонда ўтказди.

Бир мамлакат жамоаларига келадиган бўлсак, шундай учрашувлардан бири чорак финал олдидан ПСЖ ҳамда "Брест" ўртасида бўлиб ўтди. 1/8 финалда эса "Реал" "Атлетико" билан, "Бавария" "Байер" билан тўқнаш келди.