Бу ҳақда "Mundo Deportivo" нашри хабар бермоқда.
Манбага кўра, Каталония клуби маблағнинг дастлабки 105 миллион евросини шу йилнинг июль ойидаёқ қабул қилиб олади, қолган 105 миллион евро эса ноябрь ойида келиб тушади. Ушбу маблағлар "Барселона"нинг трансфер бозорида фаолроқ ҳаракат қилиши ҳамда футболчиларнинг маошларини тўлаш учун молиявий имкониятларини кенгайтиришга хизмат қилади.
Кредит телеҳуқуқларни сотиш бўйича аллақачон имзолаб бўлинган амалдаги шартномалардан тушадиган даромадлар билан кафолатланади. Қайд этилишича, ушбу операция янги иқтисодий чора ҳисобланмайди, чунки гап клуб келажакда ишлаб топиши кафолатланган тушумни олдиндан олиши ҳақида кетмоқда. Шу билан бирга, "Барселона" ушбу маблағларни жалб қилгани учун фоизлар тўлаши ва тегишли харажатларни қоплашига тўғри келади.
Қўшимча молиялаштиришга бўлган эҳтиёж "Espai Barça" лойиҳасининг кечикиши билан ҳам боғлиқ. Хусусан, клуб таъмирланаётган стадиондаги VIP-ложалардан кутилаётган даромадларни ҳали олишни бошламаган бўлса-да, улар билан боғлиқ қарз мажбуриятларини бажаришга мажбур бўлмоқда.
