Баҳодир Насимов: "Бугун футболчиларимиз фақат мухлислар учун ўйнайди"

Ушбу учрашув олдидан Ўзбекистон терма жамоаси собиқ ҳужумчиси Баҳодир Насимов ўз фикрларини билдирди.

“Бугун Ўзбекистон миллий терма жамоаси Қатар устидан ғалаба қозонади. Бунга ишонаман. Бизни фақат ва фақат ютуқ қаноатлантиради. Сурия терма жамоасига қарши учрашувда учралган мағлубиятдан сўнг ўзларини оқлаш учун фақат ғалаба учун ҳаракат қилиш керак. Бугун футболчиларимиз мухлислар учун ўйнайди. “Бунёдкор” стадиони мухлислар билан тўлиб тошса керак, деб ўйлайман. Ишқибозлар бош жамоамизни қўллаб-қувватласа истаган натижамизга эришамиз. Сурияга қарши учрашувда рақиб жамоанинг барча футболчилари тинмай югуришди.

Бизнинг футболчилар эса 3-4 нафари ўйнаяпти қолгани югурмаяпти. Бундай ўйин билан ҳеч қандай натижага эришиб бўлмайди. Шунинг учун ҳам барча футболчилар бирдек жонини бериб майдонда тўп тепиши керак. Нотўғри фикр билдирган бўлсам барча мухлислардан узр сўрайман. Мен ҳам Европа футболини томоша қиламан, футболчилар ёмон ўйин кўрсатишса ҳақорат қиламан. Бу футбол. Шунинг учун ҳеч кимдан ҳафа бўлиш керак эмас. Футбол шундай спорт тури, кимдир ғалаба қозонади яна кимдир мағлуб бўлади. Ўзбекистон терма жамоасига омад тилайман.”, - дейди “Ансан Гриннерс” жамоаси ҳужумчиси Баҳодир Насимов

Жаҳонгир Сотволдиев суҳбатлашди