"Қийин ўйин бўлишини билгандик. "Пахтакор"нинг мақсади чемпион бўлиш. Бизга ҳам очколар жуда керак. Шукр, бугун бир очкони қўлга кирита олдик. Йигитларга раҳмат, улар катта меҳнат қилишди. Ҳар бир жамоада яхшиланиши керак бўлган жабҳалар етарлича топилади. Термиздан келган мухлисларимизга раҳмат. Ҳар доим ўз мухлисларимизни хурсанд қилишга ҳаракат қиламиз. Мухлисларимиз бугун уйга яхши кайфиятда қайтади деган умиддаман", - дея гап бошлади Анвар Ғофуров.
- "Сурхон" "Пахтакор" учун ноқулай рақибга айланиб бўлди. Бугунги ўйинда ҳам "Сурхон" янгилик қилмай, биринчи даврадаги ўйин режасини ўзгартирмагандек. Тўғри, қимматли очко қўлга киритилди. Лекин мусобақа жадвалидаги ўрни яхши эмас...
- Мен ундай ўйламайман. Биз етарлича вазиятлар яратдик. "Пахтакор" жуда катта ном. Улар ҳам ўз имкониятларига эга бўлди. Бугун биз анча ишончлироқ ҳаракат қилдик, дейман. Бугун эса сўнгги дақиқага қадар икки томонда ҳам вазиятлар бўлди.
- Футболчиларингиз ҳакамларга кўп эътироз билдиргандек...
- Ҳакам билан гаплашиш мумкин эмас деган қоида йўқ. Ҳакам хоҳласа ўйинни давом эттиради, хоҳласа йўқ. Кимдир ҳакамдан норози бўлади, кимдир рози. Бу футбол. Қайсидир ўйинларда эса икки жамоа ҳам ҳакамга эътироз билдирмайди. Ҳар бир жамоа ғалаба учун ҳаракат қилади. Бизга ҳам ғалаба керак. Гапирсак гап кўп. Йигитлар майдонда борини бериб ҳаракат қилишмоқда. Қаердадир бизга омад етишмаяпти. Биз намойиш этаётган футбол барибир ўз мевасини беради.
- Ўйин охиридаги вазиятнинг такрорини кўрдингизми?
- Мен сизни тушунаман, "Пахтакор" ишчиси сифатида....
- Йўқ, мен журналистман.
- Мен у вазиятни кўрмадим. Мен ҳакамларга тўлиқ ишонаман. Футболчилар ўз ишини қилсин. Наманганда бўлган воқеа менга дарс бўлди. Бугун асабий ўйин бўлди. Майдонда ўйин кечади.
- Америкалик легионер бугунги учрашув қайдномасидан ўрин олмади. У жамоага келиб қўшилишга улгурдими?
- Сантьяго биз билан машғулот ўтказмоқда, аммо у жамоага кеч қўшилди. У қоидалар бўйича бир муддат Ўзбекистондан ташқарида бўлиб келди. Секин-асталик билан жамоага қўшилиб кетади деб ўйлайман.
- "Сурхон" тўрт ойдан бери маош олмаяпти деган гаплар бор. Масалан, "Бунёдкор" устози Зейтуллаев ҳар бир ўйиндан сўнг бу ҳақда гапиради. Сиздан эса умуман бу ҳолат ҳақида бирор нарса эшитмадик. Ушбу муаммони атайлаб муҳокама қилишни истамайсизми?
- Биз ўз ишимизни қилишимиз керак. Раҳбарият бор-ку. Мен гапирганим билан вазият ўзгаради деб ўйламайман. Мен мураббийлигимни, футболчилар эса ўз ишини қилиши керак. Кундан кунга яхшиланиб боришимиз керак. Муаммо бизда ҳам бор. Ушбу саволга жавоб беришимнинг ҳожати йўқ.
