Айрим жамоалар кўп йиллик ноқулай анъаналарга чек қўйган бўлса, бошқалари учун сафардаги мағлубиятсиз юришлар давом этди. Қуйида якунланган турнинг энг муҳим рақамлари ва эътиборга молик статистик фактларини ҳавола этамиз.
— "Сўғдиёна" 4 йилдан сўнг яна "Сурхон"ни сафарда мағлуб этишга муваффақ бўлди. Жиззахликлар охирги марта 2022 йилда рақиб майдонидан 3 очко билан қайтган эди. Термиз клуби мезбон мақомидаги бундан аввалги 3 та баҳсда 1:0, 1:0, 2:1 ҳисобларида устун келган.
— "Сурхон"нинг ўз майдонидаги ғалабасиз серияси 4 та ўйинга етди. Анвар Ғофуров шогирдлари ўз майдонидаги якуний муваффақиятини 22 апрель куни "Машъал"га қарши баҳсда нишонлаганди.
— "Андижон" ўзаро тўқнашувларда кетма-кет 5 та беллашувдан бери "Нефтчи" дарвозасига йўл топа олмаяпти. "Бургутлар"нинг бу борадаги аввалги натижали уриниши 2024 йилги мавсумга тўғри келади (2:2).
— Фарғоналикларнинг "Андижон" устидан сафардаги зафарли серияси 4 та ўйинга етди. Андижонликлар илгари 2016 йили ўз майдонида "Нефтчи"дан 3 очко тортиб олишган эди.
— Ислом Исмоилов жамоаси жорий мавсум Суперлигада меҳмонда энг кўп очко жамғариб турибди ва бегона майдондаги бирорта баҳсда имкониятни бой бермади: 8 та ўйин, 6 ғалаба, 2 дуранг, 20 очко, тўплар нисбати 18:1.
— Бу йил сафарда ғалаба қозонмаган 2 та жамоа қолди: "Қўқон-1912" ва "Машъал". Муборакликлар меҳмон мақомидаги барча 9 та ўйинда мағлуб бўлган бўлса, Қўқон жамоаси 9 та баҳсда 4 очко жамғара олди.
— "Бухоро" 7 йил ўтиб ўз майдонида ОКМКни енгди. Клуб илгари 2019 йили бу вазифани уддалаган эди (2:1).
— "Бухоро"нинг ўз майдонидаги мағлубиятсиз серияси 4 та ўйинга етди. Жамоа уйдаги охирги мағлубиятини шу йилнинг 22 апрель санасида "Пахтакор"дан тан олганди (0:1). Шундан сўнг Хомяков шогирдлари "Сўғдиёна" (2:1), "Бунёдкор" (1:0), "Локомотив" (2:1) ва ОКМК (2:0) жамоалари билан баҳсларда зафар қучди.
— "Бунёдкор"нинг Суперлигадаги ғалабасиз серияси 7 та ўйинга етди. "Қалдирғочлар" аввалроқ 29 апрель куни ўз майдонида "Навбаҳор" устидан зафар қучган эди.
— "Хоразм" Суперлига доирасида "Динамо"ни сафарда юта олмаяпти. Самарқандда кечган ўзаро ўйинларнинг барчасида "Динамо"нинг қўли баланд келган (9 ўйин, 6 ғалаба, 3 дуранг).
— "Локомотив" учун "Қўқон-1912" ноқулай рақиблигича қолмоқда. "Темирйўлчилар" кетма-кет 6 та ўйиндан бери "шунқорлар"ни енга олишмаяпти. Тошкент клуби рақибини илгари 2020 йили ютган (1:0). Кейинги 6 та тўқнашувда 2 та дуранг ва 4 бор қўқонликлар ғалабаси қайд этилган.
— "Қўқон-1912"нинг Суперлигадаги 5 ўйинлик ғалабасиз юришига бу тур барҳам берилди. Андрей Шипилов шогирдлари бундан аввал 3 май куни уйда "Бунёдкор"ни мағлуб этганди (1:0).
— Рўзиқул Бердиев Суперлига доирасида 4 та ўйиндан бери Камолиддин Тожиев бошчилигидаги "Пахтакор"ни мағлуб эта олаётгани йўқ. "Аждарлар" ушбу рақибни 2024 йилнинг иккинчи даврасида таслим қилишган эди.
— Рўзиқул Бердиев кеча "Насаф" бош мураббийлигидаги 500-учрашувини ўтказди.
— "Пахтакор" бу мавсумда меҳмондаги ўйинларда мағлубият мағлубият нималигини билмаяпти: 6 ғалаба, 2 дуранг.
— Коффи Куао "Нефтчи" сафидаги дебют учрашувидаёқ ўз номини таблога ёздириб қўйди.
