- Ўйин ҳақида фикрингиз?
- Ўйинни кўрдингиз, етарли даражада ҳаяжонли баҳс бўлди. Бу худди дерби учрашувига ўхшаб кетди. Қолаверса турнир жадвалидаги ўриндан келиб чиқиб ўйин қизиқарли бўлиши кутилган эди. Яширмайман, бизда қандайдир муаммолар бор, негадир ғалаба учун кураша олмадик, лекин ютқазиб қўйишни ҳам хоҳламагандик.
Бир томондан ютқазганимиз, иккинчи томндан қизил карточка олганимиз алам қиляпти. Баҳс охирларида диққатни бир жойга жамлай олмадик ва гол ўткаиб юбордик. Бу гол умуман керак эмасди. Учрашувнинг тўлиқ картинасини оладиган бўлсак, режа бўйича ўтказдик. 69-дақиқадан кейин ўйинни кучайтирмоқчи эдик, лекин тескариси бўлди. "Насаф" тиғиз тақвимда ўйнаётганини билардик ва шунга кўра ҳозирлик кўргандик. Баҳснинг асосий қисмини ҳимояда ўтказдик, рақиб эса ўз вазиятларидан фойдаланишга ҳаракат қилди. Наилож, ҳаракат қилишда давом этамиз.
- Ўтган тур барча ўйинларда 5та қизил карточка кўрсатилганди, бу тур ҳам карточкаларсиз ўтмаяпти. Мураббий сифатида буни қандай изоҳлайсиз, чемпионат охирига келиб чарчоқ туфайлими ёки ҳамма асабийлашиб кетдими?
- Фикрингизга қўшиламан, ростан карточкалар кўп бўляпти. Футболчилар ҳам чарчаган. Ўйинлар ҳам ўзига яраша ҳаяжонли ўтяпти. Менимча, кўп нарса мавсум охири яқинлашаётгани билан бғлиқ. Жамоалар ҳар ўйинни ютишга ҳаракат қиляпти, бунинг оқибатида четлатишлар юзага келяпти.
- Бугунги баҳсда Жавоҳир Рўзиевнинг йўқлиги билиндими?
- Унда тўртта сариқ карточка борлиги сабаб ўйнай олмади. Шу боис бугунги ўйинни ўтказиб юборди. Хурсанд қилгани жиҳати, Қувондиқ Рўзиев умумий гуруҳда шуғулланиб бугун майдонга тушди. Қайсидир футболчимизнинг ўйнай олмаслиги бошқа футболчига имкон беради ва шу орқали ротация қиламиз.
- "Бухоро"ни энди қабул қилиб олганингизда Суперлигада олиб қолишни уддалай олган эдингиз. Бу йил эса ҳатто совринли ўринлар учун жамоа курашмоқда. Яқинда хушхабар эшитдик: клуб билан шартномани узайтирибсиз. Келаси мавсумда мухлислар нимани кутса бўлади?
- Энг муҳими, ғалабага бўлган иштиёқни йўқотиб қўймаслигимиз ва ҳар тур мухлисларни хурсанд қилишга ҳаракат қилишимиз лозим. Кейинги мавсум олдидан ўтириб яхши режа тузамиз ва шунга қараб ҳозирлик кўрамиз. Бунинг учун аввало вилоят ҳокими билан учрашиб, режаларни гаплашиб олишимиз керак бўлади.
