2024 йилнинг энг яхши мураббийи Тимур Кападзе: "Бу натижаларга биргаликда эришдик"

Унга кўра, Ўзбекистон олимпия терма жамоаси билан тарихда илк бор Олимпиадага чиққан Тимур Кападзе 2024 йилнинг энг яхши мураббийи деб топилди. Тантанали маросим якунида мураббийнинг фикрлари билан қизиқдик.

"Биринчи навбатда мени лойиқ кўришгани учун барчага миннатдорчилик билдираман. Қолаверса, президентимизнинг футболимизга, бизнинг жамоага ўз меҳрларини, қўллаб-қувватлашларини берганлари учун ҳам бундай натижага эришдик. ЎФА, МОҚ, Спорт вазирлигига ҳам раҳмат айтаман. Улар доим ёнимизда бўлишди. Эришган натижаларимизга мотивация бўлди. Биз биргаликда эришдик. 4 йил давомида қийин йўлни босиб ўтдик. 2 та Осиё чемпионати, Осиё ўйинлари ва муҳими тарихда илк бор Олимпиадага йўлланма олдик. 

Ўзбек футболи учун 2024 йил омадли бўлди дея оламан. 2025 йил бундан ҳам ютуқли бўлишини тилаб қоламан. Олдимизда Жаҳон чемпионати йўлланмаси бор. Ўйлайманки, йигитлар буни уддасидан чиқишади. Таклифларга келсак, албатта бор. Футболга хизмат қиламиз. Терма жамоа? Ватан жамоасида ҳар биримиз ишлаш учун тайёрмиз. Бундай ҳолат юз берса, қўлдан келганча ёрдамлашамиз",- дейди Тимур Кападзе.