Jahongir Abdumo'minov: “Uch kunlik yig'in yaxshi o'tdi”

Yig'in davomida termamiz ustozi Mirjalol Qosimov bir qator yangi futbolchilarni sinab ko'rdi. Ular orasida “Mashal” futbol klubining yarim himoyachisi Jahongir Abdumo'minov ham bor. Abdumo'minov bazi sabablarga ko'ra Turkiyada bo'lib o'tgan yoshlar o'rtasidagi jahon chempionatida qatnasha olmagandi. SHunga qaramay, Qosimov bu o'yinchini ham yig'inga chaqirishni lozim topdi. Yig'inning oxirgi kunida futbolchilar ikki tarkibga bo'lingan holda nazorat bahsini o'tkazishdi. O'yinda “Oqlar” “Ko'klar” ustidan 3:0 hisobida g'alaba qozonishdi va shu uchrashuvda Jahongir Abdumo'minov “Oqlar” safida harakat qildi. Yig'in yakuniga etgach, yosh yarim himoyachining fikrlari bilan qiziqdik.


“Uch kunlik yig'in yaxshi o'tdi, - deydi Jahongir Abdumo'minov. – Bunda terma jamoamiz bosh murabbiyi Mirjalol Qosimov bir nechta yangi futbolchilarni tekshirib oldi. Mashg'ulotlar ham, yig'in oxiridagi nazorat uchrashuvi ham ko'tarinki ruhda kechdi. Nazorat bahsida bizning jamoa 3:0 hisobida g'alaba qozondi, lekin muhimi bu emas. Asosiysi barcha futbolchilar o'yin amaliyotiga ega bo'lishdi. O'z o'yinim haqida nima deyishim mumkin? Yaxshisi, bu hada murabbiylar, mutaxassislar fikr bildirgani maqul. To'g'ri, zo'r o'yin namoyish etdim deya olmayman, ammo qo'ldan kelgancha harakat qildim. O'yin yakuniga etgach, bosh murabbiy Mirjalol Qo'shoqovich yig'inda ishtirok etgan hammaga rahmat aytdi va barcha futbolchilarga ishonishini bildirdi. Murabbiyning aytishicha, shu oyning oxirlarida terma jamoamiz yana yig'iladi va Iordaniya bilan ikkita uchrashuvga tayyogarlikni boshlaydi. Nasib qilsa, Iordaniya to'sig'idan o'tib, muxlislarga quvonch ulashamiz”.

Xayrulla Xoliqov suhbatlashdi