Jafar Irismetov: “Lokomotiv” – “Bunyodkor” bahsida imkoniyatlar 50ga50”

Yodingizda bo'lsa kerak, ushbu klublarning dastlabki bahsida 2:2 natijasi qayd etilgandi. Demak bugun kim yutsa, o'sha jamoa final yo'llanmasini qo'lga kiritadi.

Murosasiz ruhda o'tishi kutilayotgan mazkur o'yin oldidan, o'z vaqtida milliy chempionatimizda va Qozog'iston chempionatida to'purarlik mahoratini namoyish etib, bir necha bor mamlakat Kuboklarini qo'lga kiritgan Jafar Irismetovning mulohazalari bilan qiziqdik.

- Jafar aka, bugun Toshkentda kechadigan yarim final javob uchrashuvi oldidan har kim turli xil fikrlarni bildirmoqda. SHu o'rinda sizning ham mazkur o'yin oldidan qarashlaringizni bilmoqchi edik.
- Ha, bugungi o'yin keskin suratda o'tishi turgan gap. Boisi poytaxtning ikkala jamoasi ham faqat g'alaba uchun maydonga chiqadi. Ikkisi ham bir-biriga jiddiy raqobatchi sanaladi. Birinchi o'yinda, adashmasam durang qayd etilgandi. Lekin shunga qaramay, javob bahsi oldidan shaxsan men bu ikkala klubning ham imkoniyatlarini 50ga50 baholayman.

- Xabaringiz bo'lsa kerak, “Bunyodkor”ning asosiy posboni, yarim jamoa hisoblanmish Ignatiy Nesterov yaqinda jiddiy jarohat olib, safdan chiqdi. Aytishlaricha mahoratli darvozabon uchun mavsum poyoniga etgan. Nima deb o'ylaysiz, ushbu yo'qotish “Bunyodkor”ning zarariga xizmat qilmasmikin?
- To'g'ri, Nesterovning tajribasi katta. U bo'lganida balki jamoasiga oson bo'lardi. Ammo o'ylaymanki, bu - “Bunyodkor” uchun jiddiy yo'qotish bo'lib qolmaydi va murabbiylar shtabi ikkinchi posbonni o'yinga tayyorlay oladi. Menimcha, Murod Zuhurov ham yomon ko'rinmayapti.

- Ertaga shuningdek, mamlakat Kubogining yana bir yarim final uchrashuvi bo'lib o'tadi. Qarshida kechadigan “Nasaf” – “Paxtakor” bahsida ko'proq kimning imkoniyatini yuqori baholaysiz?
- Ushbu jamoalarning ham birinchi o'yinida durang qayd etilganligini inobatga olib aytadigan bo'lsak, ertaga ko'proq “Nasaf”da imkoniyat yaxshi deyish mumkin. “Paxtakor” ham yomon o'yin ko'rsatmayapti. Tarkibi asosan yoshlardan iborat bo'lgan jamoaga oxirgi paytlarda bir tekisda barqaror o'yin ko'rsatish qiyin bo'lmoqda. Lekin bu jamoa ham final yo'llanmasini qo'lga kiritish uchun bor imkoniyatini ishga solishi aniq. “Nasaf” esa biroz tajribali ekanligini unutmasli kerak. Boshqacha aytganda, bu o'yinni 60ga40 deb baholagan bo'lardim.

- Sizningcha, ushbu juftliklarda g'olib chiqqan qaysi klub bosh sovrinni qo'lga kiritadi?
- Keng qamrovda olib qaraydigan bo'lsak, bu yil Kubokni poytaxt klublaridan biri olish extimoli yuqori. Bu borada ko'proq “Lokomotiv” bilan “Bunyodkor”ni ko'rsatgan bo'lardim. CHunki vaziyatga real baho beradigan bo'lsak, bugungi kunda ushbu klublarning imkoniyati boshqalarga nisbatan yuqori. Ayniqsa “temiryo'lchilar” bu yil mamlakat Kubogi va chempionlikni qo'lga kiritish uchun astoydil kurashishini yashirmayapti. Bu klub oltin dubl qilishni o'z oldiga maqsad qilib qo'ygan. SHu bois tarkibi ham kuchli ko'rinish olgan.

“Bunyodkor”ning esa Kubok o'yinlarida tajribasi katta. To'g'ri, “Nasaf” ham bu yilgi chempionatda barqaror o'yin namoyish etmoqda. Jamoa ancha vaqtdan beri yutqazmayati. Ammo baribir Toshkent jamoalarining Kubokni qo'lga kiritish imkoniyati yuqori, menimcha.

Islombek Rustambekov suhbatlashdi.