Yangilanayotgan "Metallurg" ikkinchi liga klubini mag'lub etdi

Metallurgchilar poytaxtning “Oqtepa” jamoasi mehmoni bo'lib, 3:1 hisobida g'alaba qozonishdi.

Jamoa murabbiylari mazkur nazorat uchrashuvida ham asosan “Metallurg” ko'rigida bo'lib turgan yangi o'yinchilarga ko'proq etibor qaratishdi. Birinchi taymda bekobodliklarning amalda asosiy tarkibi bo'lishi kutilayotgan futbolchilari to'liq ustunlikka ega bo'lishdi va mezbonlar darvozasini ikki marta aniq nishonga olishdi. 

Avvaliga Zafar Safaev mezbonlar hujumini bartaraf etib, madanchilarning tezkor qarshi hujumini boshlab berdi. Darvozabondan to'pni qabul qilib olgan Alisher Ziyovuddinov tempni susaytirmasdan Zohid Abdullaevni “Oqtepa” posboni bilan randevuga chiqardi. Birga bir vaziyatdan esa “Metallurg” sardori unumli foydalanib, hisobni ochdi – 1:0.  

Birinchi taym tugashiga besh daqiqa vaqt qolganda esa Islom Isoqjonov qanotda raqib himoyachilarini ortda qoldirib, to'pni jarima maydoni markaziga uzatdi. Alisher Ziyovuddinov Ravshan Yagudin bilan yakkama yakka holatdan unumli foydalandi. Darvozabonni aldab o'tib, o'tkir burchak ostida to'pni darvozaga yo'lladi – 2:0.

Bekobodliklar birinchi bo'limni yirik hisobda o'z foydalariga yakunlashlari ham mumkin edi. Biroq Ravshan Yagudin ikki marta penaltini qaytarishga muvaffaq bo'ldi hamda garchi ikkita to'p o'tkazib yuborgan bo'lsada “taym qahramoni”ga aylandi.

Ikkinchi bo'limda “Metallurg” murabbiylari asosan ko'rikka kelgan yangi o'yinchilar hamda yoshlar tarkibidan qo'shilgan futbolchilarga imkoniyat berishdi. Bu esa o'yinning tenglashishiga olib keldi va jamoalar bu taymda bittadan gol almashishdi. Har ikkala jamoa gollarni 11 mertlik belgidan – jarima to'pidan kiritdi.

“Oqtepa” – “Metallurg”  – 1:3 (0:2). Toshkent. 13 yanvar 2018 yil. Nazorat uchrashuvi.
Hakamlar: Olim Tolibjonov, Olim Abduvosilov, Doniyor Saylolov.
Nazoratchi: Marat Ismoilov.
Gollar: Zohid Abdullaev (17), Alisher Ziyovuddinov (39), Timur Hakimov (65-p), Timur Tolipov (78-p).
Amalga oshirilmagan penaltilar: Alisher Ziyovuddinov (12), SHahzod SHaymanov (31).
“Metallurg”: Zafar Safaev, SHerzod Fayziev, Abror Xusinov, Jasur Hasanov, Abror Toshqo'ziev, Jahongir Abdumo'minov, Azamat Roziqov, SHahzod SHaymanov, Islom Isoqjonov, Alisher Ziyovuddinov, Zohid Abdullaev.
Zaxiradan maydonga tushganlar: Nikita Ribkin, Muhammadjon Sultonov, Muhammadodil Qahramonov, Alisher Mirzaev, Xudoyshukur Sattorov, Doniyor Hoshimov, Timur Tolipov, Mirto'ra Akbarov, Javohir Musajonov, Abdulla Islomov.