Xurshid To'ychiboev: "Turon" loyihasi o'zbek futbolida burilish yasay oladi"

Xususan, Yaypanning "Turon" klubi ham joriy mavsumdan ayollar jamoasini tashkil etdi. U-16 ayollar chempionatida ishtirok etgan jamoa musobaqaning yakuniy final bosqichiga qadar etib bordi. SHu va boshqa mavzularda saytimiz muxbiri "Turon" W (U-16) jamoasi yordamchi murabbiyi Xurshid To'ychiboev bilan intervyu tashkil etdi.

- "Turon" klubiga kelishingiz qanday yuz berdi? SHuningdek klubning ayollar jamoasini shakllanish jarayoni haqida aytib bersangiz...

- "Turon" klubida sport direktori Sobir Xamidovning taklifiga ko'ra ish boshladim. Jamoani birdaniga tashkil etish oson bo'lmaydi albatta. Bu borada avvalgi tajribalar qo'l keldi. Balki bu jarayon ko'zga ko'rinmaydigan jihatlardandir. Lekin shuni ayta olaman-ki, so'ngi yillarda yurtimizda ayollar futboli ham anchayin o'sdi.

- Murabbiylik sohasida vodiy klublarida ishlab kelgansiz. Sizningcha, O'zbekistonda ayollar futbolchi qay daraja rivojlanmoqda?

- Aytib o'tganimdek, ayollar futbolida o'sish sezilarli darajada ko'zga tashlanmoqda. Buni jamoalarimiz xalqaro musobaqalarda ham munosib qatnashayotgani ko'rsatib turibdi.

Bundan tashqari, joriy mavsumdan yurtimizda U-16 hamda U-14 qizlar chempionatlari tashkil etilganligini mazkur sohaga bo'lgan etiborning yanada kuchayganligidan dalolat beradi.

- "Turon" klubida bir yildan buyon ishlab kelayapsiz. Bu jamoa haqida fikringiz qanday, yani nimalarni ayta olasiz?

- Tashkil topganiga endigina 4 yil to'lgan xususiy klubning Superligada ishtirok etishi bu - juda yaxshi natija. Aniq ayta olaman, "Turon" loyihasi o'zbek futbolida tub burilish yasay oladi.

- Joriy mavsumda "Turon"ning asosiy tarkib jamoasida 3 murabbiy ishladi. Islombek Ismoilov, Igor SHkvirin va Bahrom Xakimov. Sizningcha, ushbu murabbiylar orasidan qaysi birining davrida jamoa eng kuchli o'yin namoyish etdi?

- Yosh murabbiy Islombek Ismoilovning Superligadagi ilk faoliyati chakki emas. Igor SHkvirin va Bahrom Xakimovlarni top murabbiylar deb hisoblayman. Savolingizga aniqroq javob beradigan bo'lsam, natija talab qilingan joyda statistik jihatdan qaysi murabbiy eng yuqori natija ko'rsatgan bo'lsa, shu murabbiyni eng yaxshi deb ko'rsatgan bo'lardim.

- Ayollar futbolida qaysi murabbiyni eng yaxshi deb aytgan bo'lardingiz? 

- SHaxsiy xulosalarimga ko'ra ayollar futbolida Bahrom Norsafarov va Ilhom Xanjaralievlarni eng kuchli deb aytgan bo'lardim.

Bekzod Tolibov suhbatlashdi