Vladimir Bubanya: "Andijon"dagi debyut mavsumim alo darajada o'tdi"

Albatta, jamoaning Pro ligada muvaffaqiyatli ishtirok etishida jamoadagi futbolchilarning o'rni beqiyos bo'lgani ayni haqiqat. 

Bu masalada gap ketganda legioner o'yinchilarning xizmatini unutmaslik lozim. Serbiyalik legioner himoyachi Vladimir Bubanya ham muxlislar mehrini qozongan futbolchilardan biri bo'ldi. U 25 ta uchrashuvda raqiblar darvozasiga 3 ta gol urdi. Uning ham himoyadagi ishonchli o'yinlari jamoaning Superligaga qaytishida muhim omillardan biri bo'ldi. Mudofaa vakili "Mashal", "Turon" va "SHo'rtan"ga qarshi Andijondagi bahslarda Bubanya gollari bilan jamoasining g'alabalari uchun katta hissa qo'shdi. 

Serbiyalik legionerga ortda qolgan mavsum borasidagi ayrim savollar bilan murojaat qildik.   

- Vladimir, “Andijon” klubida o'tkazgan debyut mavsumingizdan har tomonlama qoniqqan bo'lsangiz kerak-a?

- Ha, o'ylaymanki, birinchi mavsum alo darajada o'tdi.

- Bungacha Superliga faoliyat olib borgansiz. Ilk bor Pro ligada to'p tepdingiz. Ayting-chi, uning darajasi qanday?

- Albatta, bungacha men Superligada o'ynaganman. Pro ligada nihoyasiga etgan mavsum ham ancha ko'tarinki ruhda o'tdi. Ayniqsa, "Andijon", "Buxoro" va "Turon" klublarining mavsumni zo'r o'tkazib, Superligaga chiqishgani ham fikrimga isbot bo'la oladi.

- Siz uchun esda qoladigan uchrashuvlar qaysilari bo'ldi?

- O'yinning oxirgi daqiqalarida ikki-uch bor to'plar kiritib, o'ziga xos natija ko'rsata olganimizni aytishim mumkin.

- Siz o'ynagan jamoalaringizda 15-raqam ostida to'p tepasiz. Buning sababini ayta olasizmi?

- 15 — mening omadli raqamim.

-  "Andijon" bilan birgalikda vazifani muvaffaqiyatli bajara oldingiz. Oson bo'lmagan mavsumdan so'ng qaerda hordiq chiqaryapsiz? 

-  Eng asosiysi, biz o'z oldimizga qo'yilgan vazifani bajara oldik. Hozirda oilam davrasida – uyimda hordiq chiqaryapman.

-  Kelasi yil uchun rejalaringiz qanday? Yana "Andijon"dagi faoliyatingizni davom ettirasizmi?

-  Mavsum yaxshi o'tdi. Hozirda mening xizmatimga qiziqish bildirgan 2-3 ta jamoadan takliflar bor. Agar hammasi ko'ngildagidek davom etsa, "Andijon"da qolib o'ynayveraman.