Vadim Abramov: "Meni chetlatishdimi? Buni endi sizdan eshityapman"

Bu xabarni o'qib biz ham lol qoldik va nima sababdan degan savol yuzaga keldi. SHundan so'ng Abramov bilan bog'lanib uning fikrlari bilan qiziqdik.

- Meni chetlatishdimi? Bu hazilmi yo chinmi? Mening xabarim yo'q. Buni endi birinchi marta sizdan eshitib turibman, - dedi Vadim Karlenovich hayron bo'lib. - To'g'risi, nima uchun futboldan chetlatilganimni bilmayman. 

- Sizni O'FF va PFL shaniga noto'g'ri fikrlar bildirgan deb yozilgan.

- Ha, shundaymi? Biz - futbol kishilarimiz. Futbolda har kimning o'z fikrini aytishga haqqi yo'qmi? Kecha PFLda yig'ilish bo'ldi. Unda men ham qatnashdim. Bir-ikkita gapga o'z munosabatimni bildirdim. Eshitgan bo'lsangiz kerak, keyingi yil oliy va birinchi ligada o'ynash uchun futbolchilar normativ topshiradi. Normativ juda murakkab tuzilgan, uni hatto Bobbi CHarlton ham topshirolmasdi. Men PFLning bazi qarorlari bo'yicha o'z fikrimni aytdim, balki bironta gapim yoqmagan bo'lishi mumkin.

- Endi federaciyaga borib masalaga oydinlik kiritsangiz kerak?

- Albatta, boraman. Kimgadir gaplarim yoqmagan bo'lsa, kechaning o'zida yuzimga aytishsa bo'lardi. Endi federaciyaga o'tib tushuntirish berishlarini so'rayman. Agar hamma meni o'zbek futboli uchun keraksiz odam deb hisoblasa, buning uchun meni chetlatishlari shart emas, o'zimga aytishsa indamay futboldan ketaman.

X.Xoliqov suhbatlashdi.