U-20 Osiyo kubogi oldidan. Jamoliddin Rahmatullaev: "Bu yoshdagi jamoa ko'p narsaga qodir, ular chempionlikni himoya qila oladi"

Amaldagi chempionlar dastlabki uchrashuvni Yamanga qarshi o'tkazishadi. Biz mazkur o'yin oldidan yoshlar bilan ishlash bo'yicha tajribali murabbiy Jamoliddin Rahmatullaevning fikrlari bilan qiziqdik. 

- Mazkur yosh toifasidagi (2005-2006) futbolchilar siz uchun begona emas, klublarda va terma jamoada birga ishlagansiz. Yani bu avlodni juda yaxshi bilasiz. Shunday ekan terma jamoamizning bu musobaqadagi ishtirokidan ko'proq nima kutyapsiz?

- To'g'ri aytdingiz. 2005 yilda tug'ilgan futbolchilar menga begona emas. Ularning ayrimlari bilan klubda, qolganlari bilan Toshkent terma jamoasida ishlaganmiz. Umuman bu avlodda istedodlar ko'p. Terma jamoa o'tgan vaqt mobaynida yaxshi shakllandi, tayyorgarlik ham reja asosida o'tdi. Argentina kabi yaxshi sparring raqiblar bilan uchrashuvlar tashkil qilindi. Shu sababli terma jamoamizdan bemalol sifatli o'yin va yaxshi natija kutishimiz mumkin. Minimum vazifa Jahon chempionati yo'llanmasi bo'lsa, maksimum vazifa albatta avvalgi Osiyo kubogidagi natijani takrorlash hisoblanadi. Shaxsan o'zim ulardan ortga sovrin bilan qaytishlarini kutmoqdaman.

- Terma jamoaga 2006 yillarning qo'shilgani raqobatni kuchaytirdi deya olamizmi?

- Albatta. Sababi 2006 yil futbolchilarimiz barcha bosqichlardan o'tishdi. Osiyo kubogi, Jahon chempionatlarini ko'rishdi. Ushbu omil jamoaga qo'l kelishi aniq. Yana takidlashim mumkinki, yangi qon qo'shish sog'lom raqobatni yuzaga kelishiga yordam beradi. U-20 terma jamoamizda mana shu holatni kuzatdim.

-  Bunday musobaqalarda nima hal qiluvchi rol o'ynaydi? Jamoaviy o'yin yoki individual mahorat? 

- Xalqaro turnirlarda jamoani har tomonlama tayyorlash muhim hisoblanadi. Hozirgi kunda jamoalar bir-birini yaxshi tahlil qilmoqda. Individual mahorat evaziga o'yin qursangiz raqiblar oson o'rganib oladi. Agar jamoangiz taktik va jamoaviy o'yin tomonlama shakllangan bo'lsa, har qanday holatga tayyor bo'la olasiz. 

- Eng kuchli tarafimizni nimada ko'ryapsiz?

- Zaxira o'rindig'imiz kengligini ustun tarafimiz sifatida aytgan bo'lardim. Bunday zaxira bilan rotaciyalar orqali uzoqqa bora olamiz. Imkoniyat tug'ilganida jamoamizga katta musobaqa oldidan omad yor bo'lishini, yurtimizga yorug' yuz bilan qaytishlarini tilab qolaman.