"Tottenxem", "Bavariya" va "Real" kabi jamoalarni nima birlashtirib turibdi?

Kuchli-beshlikda mag'lubiyatga uchramay kelayotgan jamoalar bilan tanishtirib o'tamiz.

Angliya premer ligasining 10-turi ortda qoldi. Ushbu chempionatda hali mag'lubiyat nimaligini bilmay kelayotgan jamoa "Tottenxem" hisoblanadi.

Maurisio Pochettino boshchiligidagi "shporlar" hozirgacha o'tkazilgan 10 ta o'yindan beshtasida g'alaba nashidasini surishgan bo'lsa, qolgan 5ta bahsda durang qayd etishgan. Turnir jadvalida ham munosib tarzda 5-pog'onada borishmoqda.

Italiya A Seriyasidagi barcha jamoalar 11-turga kelib mag'lubiyat alamini tatib ko'rishga ulgurishgan.

Ispaniyada esa Zinedin Zidan boshqaruvidagi "Real" maydonni boshi egik holda tark etmayotgan yagona jamoa sanaladi.

Franciyada ham faqatgina birgina jamoa hali mag'lubiyatga uchramagan. Hozir barchaning hayoliga PSJ kelishi mumkin, yo'q, adashdingiz. Mario Balotelli to'p surayotgan "Nicca"ni hozircha mag'lub etadigan jamoa topilmayapti. "Nicca" o'tkazilgan 11 o'yinning 9tasida g'alaba qozongan va 2 marotaba durang o'ynagan. Turnir jadvali karvonboshisi ham aynan "Nicca" jamoasi bo'lib turibdi.

Bundesligada hali mag'lubiyatga uchramagan jamoalar soni boshqa ligalarga nisbatan ancha ko'p. Germaniya chempionatining 9-turidan so'ng "Bavariya" bilan birgalikda debyutant "Leypcig" hamda 29 yoshli bosh murabbiy Yulian Nagelsmann boshqarayotgan "Xoffenxaym" mag'lubiyatsiz seriyani davom ettirishmoqda.

Ushbu jamoalar mos tarzda 1, 2 va 3-o'rinlarni band etib turishibdi.