Temurxo'ja Abduxoliqov: "Men "Lokomotiv"dan ketganim yo'q"

Bugun "Lokomotiv" hujumchisi Temurxo'ja Abduxoliqovning klub bilan xayrlashgani haqida xabar chiqdi.

SHundan so'ng ham internet, ham telefon orqali bizga ko'pchilik tomonidan murojaatlar bo'ldi. Natijada vaziyatga oydinlik kiritish maqsadida dastlab "Lokomotiv" futbol klubi Bosh direktor o'rinbosari To'labek Akramov hamda futbolchining o'zi bilan bog'landik.

"Temurxo'ja Abduxoliqov jamoamiz safini tark etgani yo'q. Uning klub bilan amalda shartnomasi bor. SHu bois ishonch bilan aytishim mumkin, Abduxoliqov hozirgi kunda jamoamiz tarkibida mashg'ulotlarda ishtirok etyapti", - deya aytib o'tdi To'labek Akramov.

Bu borada Abduxoliqovning o'zi shunday dedi: "Ochig'i, bu gap qaerdan chiqqan umuman xabarim yo'q. Kechki payt zalda bolalar bilan yig'ilib futbol o'ynadik. Futboldan so'ng telefonni yoqsam, rosa ko'p qo'ng'iroqlar kelgan ekan. Hatto uyimdagilar ham qo'ng'iroq qilishibdi. Nima gap desam, hamma "Lokomotiv"dan ketdingmi deb so'rayapti. To'g'risi, bundan hayron qoldim va boshida biroz tushunmadim. SHuni aytishim mumkin, men hozir ham "Loko" azosiman va jamoadan ketganim yo'q. Kecha mashg'ulotga bordim, bugun esa hammaga dam berildi, ertaga yana mashg'ulotga boraman. Oldinda yana ikkita tur qoldi va professional futbolchi sifatida shartnomam muddati tugaguncha shu erda bo'laman. Undan keyin nima bo'lishini esa vaqt ko'rsatadi".

X.Xoliqov.