Temur Turdiev: "Dinamo" bilan o'yinda ham g'alaba uchun o'ynaymiz"

Biz uchrashuvdan keyin mezbonlar bosh murabbiyi Temur Turdievning fikrlari bilan qiziqdik.

- Bellashuvda mehmonlar hisobni ochishdi. "Zomin"ning goliga bir daqiqa ichida javob qaytarganimiz bizning yutug'imiz bo'ldi. SHundan keyin mehmonlar yana bir marta hisobda oldinga chiqib olishdi. Bu safar ham hisobni tezda tenglashtira oldik. Aytishim kerak, birinchi bo'limda bizning o'yin unchalik qovushgani yo'q. Aksincha, mehmonlar yaxshiroq harakat qilishdi. Ularda kuchli jamoa borligi ko'rinib turdi. SHunchaki, hisob 1:1 bo'lib turganida "Zomin"ning bir azosi qizil kartochka olgani ham ularning o'yiniga salbiy tasir qildi, chog'i.

Tanaffusdan keyin ustunlik to'laligicha biz tarafda bo'ldi. Yakunda natija ham shunga mos bo'ldi. Bu safar biz bo'lim avvalida gol urdik. Undan keyin to'rtinchi, beshinchi va oltinchi golni ham urgandik. Ammo ofsayd deya baholangan oltinchi golimiz inobatga olinmadi. Navbatdagi turda "Dinamo"ni qabul qilamiz. Garchi samarqandliklar etakchilardan biri bo'lsa-da, uchrashuvda g'alaba uchun o'ynaymiz, - deydi Turdiev.

Furqatbek Nishonov