Srechko Katanec: "Suriyaga qarshi o'zimizning eng yaxshi o'yinimizni ko'rsatamiz"

- Janob Srechko, Suriyaga qarshi o'yindan nimalar kutyapsiz?

- Biz o'zimizning eng yaxshi o'yinimiznimizni ko'rsatishni maqsad qilganmiz. Hammasi oddiy, ertaga uchrashuvda g'alaba qozonish uchun maydonga chiqamiz.

- Jaloliddin Masharipov, o'yin va musobaqa haqida nimalar deya olasiz?

- Men Osiyo kubogida ikkinchi marta qatnashyapman. Bundan juda baxtliman. Bu turnirdan ko'p narsa kutyapmiz. Bizni qo'llab-quvvatlash uchun Qatarga juda ko'p muxlislarimiz kelgan. Bu narsa albatta futbolchilarni xursand qiladi.

- O'zbekiston termasidagi faoliyatingiz davomida eng asosiy o'yinchilaringizdan biri bo'lgan Eldor SHomurodov jarohat oldi va Osiyo kubogida qatnashmaydi. Bu vaziyatda sizda boshqa zaxira rejasi bormi?

- Biz uning yo'qligidan biroz afsusdamiz, Eldor biz uchun qanday muhim o'yinchi ekanini barcha biladi. Istalgan jamoa SHomurodov, Masharipov kabi o'yinchilar o'z tarkibida bo'lishini istaydi. Biz o'zimizning eng yaxshi o'yinimizni ko'rsatamiz, hammasi joyida.

- Jalollidin, bu sizning ikkinchi Osiyo kubogingiz. O'tgan safar jamoa tarkibida Nesterov, Ahmedov kabi juda ko'p tajribali o'yinchilar bor edi. Bu safargi tarkib ancha yosh. Oldingi terma jamoa bilan hozirgisi o'rtasida qanday farqlar bor?

- Bir necha kun avval ham shu masalani o'ylagandim. Avvalgi tarkibdan faqatgina men va Otabek SHukurov hozir ham o'ynamoqdamiz. Eldor jarohat olib qoldi. Menimcha, hozirda bizda ko'proq intizom, o'yin uslubimiz va ishonch bor. Avvalgi tarkibda nom taraflama, talanti taraflama kuchli bo'lgan bo'lishi mumkin, biroq hozirda biz ancha taktik va jamoaviy jihatdan kuchliroqmiz. SHu taraflama biz hozirda kuchliroq bo'lsak kerak deb o'ylayman.

- Janob Katanec, birinchi raqibingiz bo'lgan Suriya terma jamoasiga qanday baho bera olasiz?

- Oldin bir necha marta Suriyaga qarshi o'yinlar o'tkazganman. Ular juda kuchli va keskin jamoa, jangovarlik juda yuqori. Hozir ular haqida barcha narsani bilamiz, ular ham biz haqimizda hamma narsani bilishadi. Bu safar raqib tarkibida yangi futbolchilar bor. Bir nechta kuchli legionerlar ham bor. Bu albatta ularning kuchli tarafi. Suriyaga qarshi o'yin juda qiyin bo'ladi. Umid qilamanki, biz yaxshiroq harakat qilamiz.

- Suriya terma jamoasi bilan o'yindan nimalar kutyapsiz?

- Men ancha yildan beri futboldaman. Har safar yangi narsa o'rganman. Oldin zo'r harakat qilgan futbolchi, bu safar yomon o'ynashi mumkin. Futbol shunisi bilan qiziq. Hammasi vaziyatga, referilarga va holatga bog'liq. Umuman har bir detal muhim. Oldindan hech narsani bila olmaymiz. Bizning ishimiz o'z o'yinimizni ko'rsatish va tartibni saqlash.

- Jaloliddin, bu sizning ikkinchi Osiyo kubogingiz ekanini aytdingiz. O'z tajribangizdan kelib chiqib, jamoadagi yosh futbolchilarga nimalarni o'rgatishingiz mumkin?

- Birinchi safar ham yomon o'ynamaganmiz. Avstraliyaga qarshi ham yaxshi harakat qilgandik. Penaltilar seriyasida yutqazib qo'ygandik. Bizning jamoa hozirda juda kuchli. Juda yaxshi jamoa shakllangan. Buni JCH saralashidagi Eronga qarshi o'yinda ham ko'rsatib qo'ydik. Hozir muxlislarimizda ham, bizda ham ishonch yuqori. Biz ularni xursand qilish uchun bor kuchimiz bilan harakat qilamiz. Menimcha, to'rttalikka kirsak kerak.

- Janob Katanec, BAAda juda yaxshi o'yin ko'rsatayotgan Aziz G'aniev nega terma jamoaga chaqirilmadi? SHunchaki, bu boradagi poziciyangiz qiziq...

- U hozir jamoa tarkibida emas. Terma jamoada yo'q futbolchi haqida gapirish qanchalik to'g'ri, bilmayman. Bu mening qarorim va buni muhokama qilishni istamayman. 

- Jaloliddin, O'zbekiston termasi har doim yaxshi jamoa bo'lgan, ammo har safar nimadir etmagan. To'rttalikka kirishimiz kerakligi haqida gapirdingiz, bu narsaga futbolchilar qanchalik ishonmoqdalar? Qanday faktorlarga asoslanib bunga ishonmoqdasiz?

- Oldin terma jamoada bir yoki ikkita lider bo'lardi. O'shanda ularning o'yini o'xshamasa, jamoa yutqazib qo'yardi. Hozir esa bizda kimningdir, xatto mening o'yinim o'xshamasa ham jamoa buni bildirmaydi. Hozir esa bizda kimningdir, xatto mening o'yinim o'xshamasa ham jamoa buni bildirmaydi. Etibor bersangiz, hozir bizda zaxiridan tushgan o'yinchilar doim yaxshiroq ko'rinmoqda. Bu jamoa zaxirasining ancha kuchli ekanidan dalolat. Hozirda terma jamoada bir xil kuchga ega ikkita tarkib shakllangan. Milliy jamoamizdagi yoshlar ham juda yaxshi darajaga chiqishdi.

- Jaloliddin, siz juda tajribali futbolchisiz. Tarkibdagi aksar futbolchilar uchun bu birinchi Osiyo kubogi. O'z tajribangizni qay tarzda boshqa o'yinchilarga etkazasiz?

- To'g'ri, ko'p futbolchilar uchun Osiyo kubogi birinchisi. Termadagi futbolchilarimizning juda ko'pi katta o'yinlarda maydonga tushishgan. OCHL, yoshlar o'rtasidagi Osiyo kubogi, Jahon chempionati va hokazo. O'ylaymanki, Osiyo kubogida yosh o'yinchilarga bu turnir qiyin bo'lmaydi. Kimgadir qiyin bo'lsa, biz o'z qo'limizdan kelgan barcha yordamni berib kelyapmiz.

Malumot uchun, Osiyo kubogi guruh bosqichi ilk turidan o'rin olgan O'zbekiston - Suriya uchrashuvi 13 yanvar kuni soat 22:30da start oladi.

Jalolxon Inog'omxo'jaev yozib oldi