"SHo'rtan" akademiyasi maydoniga avtomatik sug'orish tizimi o'rnatildi

"Futbol jamoalari tatilga chiqishiga qaramay, klublar yangi mavsumga tayyorgarlikni boshlab yuborishadi. Har xolda o'z oldiga yuksak maqsadlarni qo'ygan klublar yangi mavsum taraddudini hozirdanoq boshlab yuborishgan.

"SHo'rtan" jamoasi joriy mavsum Pro ligada 5-o'rinni, yoshlarimiz "SHo'rtan" U-19 jamoasi esa 24 jamoa orasida O'zbekiston birinchiligida kuchli beshlikdan joy egalladi. SHu tariqa g'uzorliklar uchun 2023 yilgi futbol mavsumi o'z yakuniga etdi.

"Futbol-talim muassasalari tarmog'ini kengaytirish hamda xalqaro standartlarga mos keladigan futbol infratuzilmasini rivojlantirish chora-tadbirlari to'g'risida" PQ-355 sonli O'zbekiston Respublikasi prezidenti qarori ijrosini taminlash va 2024 yilgi mavsumga puxta tayyorgarlik ko'rish maqsadida “SHo'rtan” professional futbol klubi hozirdanoq tayyorgarlik ishlari boshlab yuborgan.

Klub tayyorgarlik doirasida G'uzor "Markaziy" o'yingohi yoritish tizimini 1400 lyuksga keltirdi. Stadion maysasini sug'orish tizimi ham avtomatlashtirildi. Mavsum yakunida maydonga mineral o'g'itlar bilan ishlov berilib, yangi mavsum uchun yopildi.  

O'z kelajagi haqida qayg'urayotgan klub futbol akademiyasi maydoniga ham avtomatik sug'orish tizimi va yorug'lik tizimlarini o'rnatdi", – deyiladi xabarda.