SHavkat Saidov: "Metallurg"ning maqsadi yoshlar bilan yaxshi natija qayd etish"

"Bugun ikkita har xil bo'limlarga guvoh bo'ldik. Birinchi bo'limda "Mashal" to'liq ustunlik qildi, hatto ular 3-4 ta to'p kiritishlari ham mumkin edi. Ikkinchi bo'limda esa aksincha, biz ustunlik qildik. Yigitlarga tanaffusda bergan ko'rsatmalarimizga amal qilib o'yinni bizning foydamizga hal qilganliklari uchun murabbiylar shtabi nomidan minnatdorchilik bildiraman.

- "Metallurg" tarkibida bir nechta yosh o'yinchilar harakat qilayotganiga qaramay jamoa natija ko'rsatmoqda. Yoshlar mavsum davomida stabillikni saqlab qola oladimi?
- Bir necha yillardan buyon tarkibimizda katta o'zgarishlar qilmadik, bu yil esa ko'plab futbolchilar jamoani tark etishdi. Ularning o'rnini asosan o'rinbosarlar tarkibimizdagi yosh o'yinchilar, shuningdek boshqa jamoalardan taklif etilgan ayrim futbolchilar to'ldirishdi. Jamoamizning asosiy maqsadi yoshlar bilan o'tgan yilgidan yaxshiroq natija qayd etish.

- Oliy liga 2 va 3 turlari orasida ancha vaqt bor. Jamoa bu vaziyatdan qanday chiqib ketadi?
- Klubimiz odatdagidek besh kunlik rejim asosida mashg'ulotlarni olib boradi. Bu orada O'zbekiston kubogining 1/16 finali doirasida o'yinimiz bor, kubokdagi maqsadimiz 1/8 finalga chiqish. Ushbu uchrashuvdan keyin esa CHirchiqda mashg'ulotlarni davom ettiramiz.

- Kiritilgan gollar haqida qanday fikrdasiz?
- Men birinchi golimizga to'xtalmoqchiman. O'yindagi hisobni tenglashtiruvchi golni kiritgan vaziyatimizda "Bunyodkor"dan taklif etilgan Javohir Esonqulov oxirigacha kurashdi. Bu yigit 1997 yilda tavallud topgan, agar mana shu tempda o'ynashda davom etsa kelajakda terma jamoada ham ko'rishimiz mumkin.


"Mashal" matbuot xizmati