SHavkat Mirziyoev "Metallurg" futbol klubi qoshidagi akademiyani ko'zdan kechirdi

Ushbu maktab Ispaniyaning taniqli "Real Madrid" klubi jamg'armasi ko'magida tashkil etilgan bo'lib, o'tgan yili oktyabrda faoliyat boshlagan. Tabiiy va suniy chimli stadionlar, fitnes zali, o'quv binolari va yotoqxonada zamonaviy sharoitlar yaratilgan. O'quv-mashg'ulotlari "Real Madrid" futbol klubi ananalariga mos ravishda olib boriladi. Murabbiylarning uch nafari ispaniyalik.

Bugungi kunda akademiyada 200 nafardan ortiq o'quvchi saboq olmoqda. Bu erda o'qish istagidagi yoshlar ko'p. SHu bois 11 yoshdan 17 yoshgacha bolalar tanlov asosida qabul qilinadi. Yaqinda 48 nafar iqtidorli tarbiyalanuvchi Ispaniyada mahorat oshirib keldi.

Davlatimiz rahbari akademiyada yaratilgan sharoitlarni ko'zdan kechirdi, bolalar bilan suhbatlashdi.

"SHunday zamonaviy sharoitlarda o'qiyotganingiz, yonib turgan ko'zlaringizni ko'rib, xursand bo'ldim.

Kelgusida sizlardan mashhur futbolchilar, chempionlar etishib chiqishiga ishonaman. Eng muhimi, sog'lom bo'lib ulg'ayasiz, farzandlaringizni ham sportga oshno qilib tarbiyalaysiz. Maqsadimiz - yoshlar o'rtasida ana shunday muhitni shakllantirish", – dedi Prezident. 

Davlatimiz rahbari mutasaddilarga bu futbol maktabi tajribasini ommalashtirish bo'yicha ko'rsatma berdi.