Server Jeparov: "Neftchi" kabi raqiblarga qarshi kamchiliklar yaqqol ko'rinadi"

"Raqibni tabriklayman. Uchrashuv tashkilotchilariga minnatdorchilik bildiraman. Maydon ideal holatda edi. Bizning o'yin uslubimizga to'liq mos keladigan maydon. Yigitlarimiz uchinchi o'yinni o'tkazishdi, o'zlarini yaxshi ko'rsata olishdi. Jismoniy tomondan ishlashimiz kerak. Yosh futbolchilarimiz katta akalariga qarshi o'ynashdi. Texnik tomondan yutqazmadik deya olaman. Bir necha vaziyatlar ham yaratdik. Yigitlarga harakat qilganlari uchun rahmat aytaman. Xatolarni kelgusida tuzatishga harakat qilamiz", -deydi Server Jeparov.

– Jamoangiz ikki Superliga va bitta Pro liga klubi bilan o'ynadi. Bu qanchalik tajriba bo'ldi?

– Katta tajriba oldik. Murabbiy sifatida ham. Bu kabi raqiblarga qarshi kamchiligingiz yaqqol ko'rinadi. 

– Jamoamiz yosh futbolchilardan tuzilgan dedingiz. Ular orasida turli yosh toifasidagi terma jamoalarimizda o'ynaydiganlari ham bormi?

– Albatta, 2006, 2007 va 2008 yillarda tug'ilgan futbolchilarimiz terma jamoalarda o'ynashadi. Biz o'z akademiyamizdan futbolchi olishni maqul ko'ramiz. 

– Jamoa oldiga Pro liga yo'llanmasi qo'yilganmi?

– Baland maqsadlar qo'yamiz. Hozirda biz birinchi ligada o'ynayapmiz. Ko'ramiz. Ishtaxa taom paytida keladi. Moliyaviy tomon juda muhim. Yaxshi jamoa uchun moliyaviy taraflama yaxshi qo'llov bo'lishi lozim. 

– Klub kim tomonidan moliyalashtiriladi?

– Shaxsiy mablag' evaziga moliyalashtiriladi. Bazi joyda men, bazi joyda Sergey Sultanovich tomonidan pul sarflanadi.