"Santos"ning quyi divizionga tushib ketganidan g'azablangan muxlislar g'alayon ko'tarishdi

"Santos" klubining Braziliya chempionati tarixida ilk marotaba A Seriyadan B seriyaga tushib ketishi natijasida klub muxlislari tomonidan norozilik namoyishi uyushtirildi. 

Jamoa so'nggi turda o'z maydonida "Fortaleza"ga 1:2 hisobida imkoniyatni boy berdi va chempionatda 17-o'rinni egallagan holda quyi ligaga ravona bo'ldi.

G'azablangan "Santos" muxlislari hakamning so'nggi hushtagi chalinmasidanoq stadionga turli buyumlarni uloqtirishni boshladi. Norozilik ko'chalar bo'ylab davom etdi.

Keskinlikni bartaraf etish uchun policiya flesh-bomba va ko'zdan yosh oqizuvchi gazdan foydalangan. Hatto vertolyot, harbiylar va policiya otliqlari jalb etilgan.

Eslatib o'tamiz, 1912 yilda asos solingan "Santos" Braziliyaning eng ko'p sovrin qo'lga kiritgan ikkinchi jamoasi hisoblanadi.