Rustam Abdullaev: "So'g'diyona" bilan o'yinni "sotmagandik"

Jamoa oliy liganing 29-turidan o'rin olgan "So'g'diyona"ga qarshi bahsda 1:3 hisobida yutqazib qo'ygach rahbariyat murabbiyni istefoga chiqardi.

"Futbol Ekspress" gazetasi muxbiri murabbiy bilan suhbat uyushtirdi. Ushbu suhbatning asosiy qismini taqdim etamiz.

"To'g'risini aytsam, "So'g'diyona"ga qarshi o'yindan oldin har xil mish-mishlar ko'payib ketdi. Bu narsa esa biz bilan uchrashuvda yuz berishini xohlamagandim. CHunki uchrashuvdan oldinoq ruhiy tomondan esankirab qolishgandi. Tashqi bosim ham kuchli bo'ldi. Turli xil gap-so'zlar oxir oqibat mana shunday holatga olib keldi. Ammo Qo'qonda toza o'yin bo'ldi va jizzaxliklar bizni ravishda yutishdi", - deydi Abdullaev.

- Murabbiylik faoliyatingiz davomida sizga kimdir kelishishni taklif qilganmi?
- Murabbiy bo'lib ishlayotgan paytimdan beri menga ham o'zaro kelishishni taklif qilishgan. Aynan "So'g'diyona"ga qarshi o'yin o'yindan oldin ham "Iltimos, yordam beringlar" deb aloqaga chiqishgandi. Ammo men bu taklifni keskin ravishda o'ylab o'tirmay rad qilgandim. Sizlardan faqat bitta narsani iltimos qilaman, xalqqa mening gaplarimni etkazing: "So'g'diyona"ga qarshi o'yinda meni ishdan bo'shatishdi, lekin o'yin halol o'tdi. Ertaga yana murabbiylik ishimni davom ettirishim va yana oilamni boqishim kerak. Insonni nohaq qoralash esa mutlaqo noto'g'ri ish.

- Sir bo'lmasa, o'yindan oldin aynan kim aloqaga chiqqanini ayta olasizmi?
- Kimligini aytgim kelmayapti. Baribir hamma joyda bu kabi holatlar bo'lib turadi. Agarda men ham "So'g'diyona", "Buxoro" yoki "Dinamo"ning o'rnida bo'lganimda "Iltimos, yordam beringlar" deb murojaat qilishim mumkin edi. Yani hamma narsani ishga solib bo'lsa ham oliy ligada jon saqlab qolish harakatida bo'lardim. Ammo biz muddatidan avval o'z ishimizni bajarib bo'ldik.

- Yana qo'shimcha bildiradigan gaplaringiz ham bormi?
- Qo'qon xalqiga va rahbarlariga shuni aytmoqchimanki, biz "So'g'diyona" bilan o'yinda qing'ir ishga qo'l urmaganmiz.


Firdavsxon suhbatlashdi