Ro'ziqul Berdiev: "Shuhrat Muhammadiev 36 yoshida yosh futbolchilardan ham tez yuguradi"

- Bugungi g'alaba bilan muxlislarni tabriklayman. Bugun stadiondagi atmosfera ajoyib bo'ldi. Ustiga-ustak O'zbekistondagi eng yaxshi jamoalardan birini mag'lub qilib, barchani xursand qildik. O'yinga keladigan bo'lsak, bu ikkala jamoa ham ochiq futbolni yaxshi ko'rishadi. Shu sababli ikkala jamoa ham hujumkor o'yin namoyish qilib berdi, deb o'ylayman. Yaratilgan vaziyatlarga qaraydigan bo'lsangiz, ikkala jamoa ham g'alabani o'ylagani ko'rinib turibdi. Biz qaerdadir tartibliroq va extiyotkor bo'lishimiz talab qilinardi, chunki OKMK jamoasi to'p bilan yaxshi harakat qiladi. Balki shular sababdir, bugun jamoamda g'alabaga bo'lgan ishtiyoq katta bo'ldi.

- G'alaba bilan tabriklayman. Sherzod Nasrullaev bugun tarkibda ko'rinmadi.

- U uchta o'yindan beri tarkibga kiritilmadi. U kasal bo'lib qolgandi, hozir davolanyapti. Sherzod keyingi o'yinlarga tayyor bo'lib qolishi kerak. U bizga kerak edi, yaxshi jismoniy holatda bo'lib turganida bizga katta nafi tegardi.

- "Nasaf" odatda o'yinni hujumda boshlardi. Bugun esa himoyadan boshlandi. Bu taktika bilan bog'liqmidi?

- OKMK jamoasini bilasizlar, juda ko'p hujum uyushtiradi va shu sababli istalgan raqibni himoyalanishga majbur qiladi. Jamoaning bu yilgi o'yin uslubi ham hujumkor. Shu sababli o'yin boshida ehtiyotkor bo'lib, himoyada yaxshi harakat qilishimiz kerak edi. Ikkinchi bo'limda joylashuvimizni o'zgartirdik, chunki birinchi bo'limda OKMKga bo'sh hududlar va imkoniyatlar berayotgandik. Ikkinchi bo'limdagi harakatlarimiz raqiblarga qiyinchiliklar tug'dirdi.

- Jamoaning yosh futbolchisi Bahromov haqida savol bermoqchi edim. Uning o'yinlari haqida fikringiz qanday? Kubokda "Paxtakor" bilan o'yinda aynan u maydonga tushganidan keyin jamoaning hujumdagi o'yinlari tezlashib ketdi.

- To'g'ri takidladingiz, aynan shu sababli ham uni zaxiradan maydonga tushirdik. Bilasiz, OKMK jamoasi o'yinni yaxshi tugatadi. Shu boisda biz kuchlarni yangilashimiz kerak edi. Ko'proq himoyalanib, qarshi hujumlarga tezroq o'tishimiz kerak bo'lgandi. Ikkita o'yindan beri imkoniyat beryapmiz, Bahromov ishonchni oqlayapti. Bundan keyin ham yoshlarga shu yo'sinda imkoniyat yaratishga harakat qilamiz.

- Oldinda jamoani Superkubok o'yini kutib turibdi. Bunda tarkib o'zgaradimi yoki shu tarkib maydonga tushadimi?

- O'zgarishlar bo'ladi. Bazi futbolchilar ko'p o'ynayotgani uchun toliqishi borligi ko'rinib turibdi. Tarkibimizda ularning o'rnini yopadigan futbolchilar bor. Balki rotaciyaga qo'l urarmiz. Bu o'yinga barcha muxlislarimizni taklif qilib qolardik. Bu tarixiy o'yin bo'ladi. Bunda g'alaba qozonib, muxlislarni xursand qilmoqchimiz. 

- OKMKning qo'lida himoyachilar sust o'ynadi, aynan Umar Eshmurodov o'z qanotidan futbolchini qo'yib yubordi. Umar va Cholovichning zaxiraga olinishi xatoga bog'liqmi yoki ularda jismoniy holatga?

- Aytganimdek, biz joylashtiruvni o'zgartirishimiz kerak edi. Uch himoyachiga o'tishimiz kerak edi, chunki raqib ham shunday taktikada o'ynayotgandi. Raqiblar tarkibida Aziz Xolmurodov maydonga tushdi, u tezkor futbolchi. Shu boisdan biz qanotga tezkor futbolchilarni tushirishimiz kerak edi. Shuhrat Muhammadiev 36 yoshida ham yosh futbolchilardan tez yuguradi. Uni qanotda o'ynatdik va bu to'g'ri bo'ldi deb o'ylayman.

- Oybek Bozorov bugun juda ko'p aldadi va to'pni ko'p yo'qotdi. Bu fikrga qanday qaraysiz?

- Oybek to'p bilan bo'lishni juda yaxshi ko'radi. Uning jamoaga qanday foyda keltirishini yaxshi bilamiz. To'g'ri, texnik xatolar ko'p bo'ladi. Lekin mehnat ham katta bo'ladi. Chunki biz taxlil qilganimizda Oybekning foydasi katta bo'lishini bilganmiz. Unga sifatliroq o'ynashi kerakligini tushuntiramiz. Biroq uning o'ziga xosligi - bu uning o'yini. Bu 10 yildan beri takrorlanib kelyapti.

- Istalgan futbolchi biror kun jarohat olishi mumkin. Masalan Abduvohid Nematov jarohat olib qolsa, darvozabonlikdan muammo bo'ladi deb o'ylamaysizmi?

- Zaxira darvozabonimizga ishonchsizlikka bormaymiz, unga ishonishda davom etamiz, u ham tajribali darvozabon. O'shanda faqatgina uning emas, butun jamoaning xatolari ko'p bo'ldi. Zaxira darvozabonini qo'rqmasdan o'yinga qo'yaveramiz. O'ylaymanki, Abduvohid bilan muammolar bo'lmaydi.