Ravshan Ermatov: Nahotki tajribali murabbiy qoidani bilmasa?

ikkala bo'limda darvozalar tomon belgilangan bittadan penalti uchrashuvning durang bilan intiho topishiga sabab bo'ldi. O'yindan keyingi matbuot anjumanida ishtirok etgan "Bunyodkor" murabbiyi Murod Otajonov jamoasining muhim o'yinda 2 ochko yo'qotganini hakamning xatosi bilan izohladi. Uning fikricha, o'yin bosh hakami Ravshan Ermatov o'yinning so'nggi daqiqalarida "Lokomotiv" darvozasi tomon penalti belgilashi kerak edi.

"Bunyodkor" futbolchisi jarima maydonchasi tashqarisidan tepgan to'p "Lokomotiv" himoyachisining qo'liga tekkan vaziyatda penalti bormidi? Nima uchun penalti belgilanmadi? Ushbu holat bo'yicha o'yinni boshqarib borgan hakamning fikrini bilish maqsadida Ravshan Ermatovga murojaat qildik.

"Bugungi kunda hattoki muxlislar ham yaxshi biladigan qo'l bilan bog'liq bo'lgan futbol qoidasini nahotki yuqori saviyali mutaxassis Murod Otajonov bilmasa? “Bunyodkor” murabbiyi etiroz bildirgan vaziyatga etibor qaratadigan bo'lsak, birinchidan, zarba berilayotgan paytda "Lokomotiv" futbolchisi teskari qarab turgandi va u to'pni ko'rmadi. Ikkinchidan, futbolchining qo'li tabiiy holatda edi. Va eng asosiysi, o'yinchi ataylab qo'li bilan to'pga o'ynamadi, aksincha to'p kuchli zarba oqibatida yaqin masofadan uning qo'liga kelib tegdi. Bunday holatda nafaqat penalti, balki maydonning boshqa joylarida ham jarima zarbasini belgilash noto'g'ri bo'ladi.

Men ham oddiy insonman. Albatta, menda ham xato-kamchiliklar bo'lib turadi. Lekin men qilgan xatolarimda birovni aybdor qilmayman. Xatolarimni o'rganib chiqib, mashg'ulotlarda ularning ustida ishlab, keyingi o'yinlarda bu xatolarni takrorlamaslikka harakat qilaman. Afsuski, bazi bir murabbiylarga o'yin davomida taktika va tarkib bilan bog'liq xatolarni tan olish uchun mardlik etishmaydi va aybni o'zidan qidirmasdan, chetdan axtarishga harakat qiladi”, deydi FIFA referisi Ravshan Ermatov.

Olimxo'ja Bo'ronov suhbatlashdi