Rasmiy xabar: “Yozyovon” jamoasiga texnik mag'lubiyat yozildi

Klublar oldiga yozgi transferlar yopilguniga qadar barcha qarzdorliklarini bartaraf etish vazifasi yuklatilgan edi. Biroq ayrim klublar mazkur holatga beparvolik bilan munosabatda bo'lishdi. Jumladan, Haqqulobodning “Norin” jamoasi Pro ligada yozgi tanaffus yakunlanguniga qadar ham mavjud qarzdorliklarni o'z vaqtida uzish bo'yicha amaliy harakatlar amalga oshirmagani sababli “Dinamo” qarshi o'yinda haqqulobodliklarga texnik mag'lubiyat yozilgan edi.

Bugun Pro liga 19-tur uchrashuvlari doirasidan o'rin olgan “Yozyovon” – “Xotira-79” o'yini ham o'tkazilmadi. Bunga sabab yozyovonliklar badal puli va tartib-intizom qo'mitasi qarorlari bo'yicha qarzdorlikni o'z vaqtida uzish borasida etarlicha amaliy ishlar bajarishmadi. Jamoa vakillari Pro ligada yozgi tanaffus yakunlanishiga 2 kun qolganidagina harakatga tushishdi. Biroq allaqachon kech bo'lib ulgurgan edi.

SHu o'rinda qayd etish joizki, PFL xuddi shunday vaziyatda bo'lgan “Xorazm” hamda “Xotira-79” jamoalariga nisbatan bunday qatiy choralar ko'rmadi. Sababi “Xorazm” va “Xotira-79” jamoalari yozgi transferlar yakunlanishidan avval mavjud kamchilik va qarzdorliklarni uzish bo'yicha kafolat xati taqdim etishdi. Biroq “Yozyovon” hamda “Norin” jamoalari rahbariyati mazkur holatga beparvolik qilishdi.