Rasman: Serxio Aguero futbolchilik faoliyatiga yakun yasadi

"Barsa" Youtube'dagi rasmiy sahifasida u ishtirokida matbuot anjumani bo'lib o'tmoqda.

Argentinalik bu qarorni yuragidagi muammo sabab qabul qildi. Aguero ko'z yoshlarini tiya olmadi va yig'lab yubordi.

"Bu matbuot anjumani shunchaki o'yinchilik faoliyatimni yakunlashga qaror qilganim uchun tashkil qilindi.

Bu juda ham qiyin paytlar, ammo men qabul qilgan qarorimdan mamnunman. Birinchidan, bu bir oy oldin men to'qnash kelgan sog'ligimdagi muammo. Gap sog'ligim haqida ketmoqda", - deydi Aguero.

Serxio 30 oktyabrda "Alaves" (1:1)ga qarshi o'yinni yakuniga etkaza olmadi va o'shandan beri davolanmoqda. Avvaliga o'yinchiinng tiklanishi uchun 3 oy ketishi malum qilingandi, ammo keyinroq muammo jiddiyroqligi malum bo'ldi.

Forvard "Barsa" tarkibida 5ta o'yinda maydonga tushib, 1ta gol urdi.

U klub darajasida Evropa Ligasi va UEFA Superkubogi, besh bor Angliya chempioni, olti bor - Angliya liga kubogi, bir bor Angliya kubogi va uch bor Angliya superkubogini qo'lga kiritdi.

Aguero Argentina terma jamoasi tarkibida Olimpiada-2008, shuningdek 2021 yilgi Amerika Kubogini qo'lga kiritgan.

33 yoshli futbolchi faoliyati davomida "Barselona"dan tashqari "Independente", "Atletiko" va "Manchester Siti" klublari sharafini himoya qilgan. Forvard 2006 yildan beri Argentina terma jamoasi sharafini himoya qilayotgan edi.