Rasman: "Barselona" va PSJ sobiq yulduzi 32 yoshida faoliyatini yakunladi

Futbolchi o'zining ijtimoiy tarmoqdagi sahifasi orqali murojaat yo'llab, jarohat sabab ushbu qarorga kelganini malum qildi.

"Maydondan tashqarida o'tgan vaqt va uzoq tiklanish jarayonidan so'ng muhim bir xabarni aytish vaqti keldi. Men faoliyatimni yakunlashga qaror qildim.

Bir yil oldin tizzamdan olgan jarohatim, afsuski, menga yuqori darajada o'ynash imkonini bermayapti. Buni qabul qilish qiyin bo'ldi. Futbol eslay olganimdan beri hayotimning bir qismi edi va men endi unga avvalgidek o'zimni bag'ishlay olmasligimni tushunib etdim.

So'nggi 20 yil davomida futbol kundalik hayotimning mazmuni, harakatlantiruvchi kuchim bo'ldi. Bugun raqobat hayajonisiz, ammo tabassum qilish uchun sabablarga to'la yangi bosqich boshlanmoqda. Oilamga doim yonimda bo'lganliklari uchun rahmat. Barchaga muhabbat va qo'llab-quvvatlash uchun tashakkur. Meni shu darajaga etkazgani uchun futbolga rahmat. Ko'rishguncha", – dedi Rafinya videomurojaatida.

Malumot uchun, Rafinya Alkantara «Barselona» akademiyasi tarbiyalanuvchisi hisoblanadi. U kataloniyaliklar safida uch marta Ispaniya chempioni bo'lgan va 2014/15 yilgi mavsumda Chempionlar ligasida g'olib chiqqan.

Faoliyati davomida xavbek "Selta", PSJ, "Inter" va "Real Sosedad" sharafini himoya qilgan, shuningdek, 2016 yilda Braziliya terma jamoasi safida Olimpiada chempioni bo'lgan. 32 yoshli Alkantaraning so'nggi klubi Qatarning "Al Arabi" jamoasi edi.