"Qo'qon-1912" Toshkentda mashg'ulotlarni boshladi. Yig'inga Osiyo chempioni qo'shildi

Kecha jamoa azolari dastlabki mashg'ulotlarni o'tkazishgan edi. Bugun esa Baxtiyor Ashurmatov shogirdlari ikki mahal mashg'ulotlarda ishtirok etishdi. Mashg'ulotlar "Paxtakor" akademiyasiga qarashli suniy qoplamali maydonda hamda "Bunyodkor" akademiyasining tabiiy maydonlarida bo'lib o'tmoqda.

"SHunqorlar"ning bugungi mashg'ulotlariga yangi futbolchilar kelib qo'shilgan. Barcha muxlislarimizga yaxshi tanish bo'lgan hujumchi, Osiyo chempioni Andrey Sidorov hamda yarim himoyachi Sobit Sindarov Toshkentning "Paxtakor" jamoasidan kelib qo'shilishgan. Hozircha bu futbolchilar jamoa ko'rigida bo'lib turishibdi. SHuningdek o'tgan mavsumning ikkinchi qismini Jizzaxning "So'g'diyona" jamoasi tarkibida o'tkazgan Muhammadanas Hasanov ham ijara muddati yakuniga etgach, jamoa tarkibiga qaytib kelgan.

"Qo'qon-1912" jamoasi 9 yanvar kuni Dushanbening "Istiqlol" klubiga qarshi o'rtoqlik o'yinida maydonga tushishi haqida xabar bergan edik. Yana ikkita o'rtoqlik o'yinlari uchun sparring raqiblar bilan kelishuvga erishildi. Bu haqida keyingi xabarlarimizda batafsil malumot beramiz", - deb yozadi "Qo'qon-1912" matbuot xizmati.

Malumot uchun, Andrey Sidorov o'tgan mavsum "Buxoro" safida 7ta o'yinda maydonga tushib, 1ta gol urdi.