"Qizilqum" jamoasi tibbiy ko'rikdan o'tmoqda

Konchilar 22 iyun kuni yozgi tatilga chiqishgandi.
Rejaga ko'ra, jamoa azolari 2 iyul kuni Toshkentda to'planishdi. Yuriy Lukin shogirdlari bugun poytaxtimizdagi "Futbol-med" tibbiy markazida ko'rikdan o'tishmoqda.

Klub matbuot xizmatining bildirishicha, navoiyliklar 4 iyul kuni Toshkent viloyatining "Bildirsoy" sog'lomlashtirish oromgohiga yo'l oladi. Ikki hafta davom etishi kutilayotgan mazkur yig'inda asosiy etibor jamoa azolarining jismoniy tiklanishiga qaratiladi.

So'ngra yig'in Toshkentda davom ettiriladi. Aynan mazkur yig'in doirasida konchilar bir nechta o'rtoqlik uchrashuvlari tashkil etishni rejalashtirishgan.

Davralar oralig'idagi tanaffus chog'ida tarkibga xorijlik legionerlar kelib qo'shilishi kutilmoqda. Jamoani esa hech kim tark etmaydi. Aksincha, birinchi davra bahslarida jarohati tufayli aksariyat uchrashuvlarni o'tkazib yuborgan tajribali darvozabon Erkin Jabborov, yarim himoyachi Alisher Sanoevlar yana jamoadoshlari safiga kelib qo'shilgan.