Prevyu. "Andijon" - "So'g'diyona"

ANDIJON – SO'G'DIYONA
6 iyun. Andijon. "Sog'lom Avlod" stadioni. 18:00
Hakamlar: Z.Qodirov, B.Qodirov, A.Qo'ldoshev, I.Garmashov.
Nazoratchi: I.Nexochin.

“Andijon” va “So'g'diyona” Oliy ligada jami 32 bora to'qnash kelgan. Natijalar vodiy klubining kichik ustunligini ko'rsatmoqda.

“Andijon” 13ta o'yinda g'alaba qozongan. So'g'diyona 12 bor g'oliblikni nishonlagan. Olti o'yin durang bilan yakunlangan. “Andijon” 49ta gol kiritgan, “So'g'diyona” hisobida 48ta gol bor. “Burgutlar” o'zaro uchrashuvlarda 46 ochkoni o'z hisobiga yozib qo'yishgan, “So'g'diyona” esa 43 ochko jamg'argan. O'zaro o'yinlardagi eng yirik g'alabalar quyidagicha:  “Andijon” - “So'g'diyona” 4:1,  “So'g'diyona ” - “Andijon ” 5:0.

O'tgan mavsumda “Andijon”, undan oldingi yilda esa “So'g'diyona” oliy ligada qatnashmagan. SHu sabab ushbu jamoalar so'ngi bor elitada 2011 yilda kuch sinashishgan. O'sha mavsumda Andijonda bo'lib o'tgan uchrashuvda mezbonlar g'olib bo'lishgan. Dastlab mehmonlar hujumchisi Arturos Fomenko hisobni ochgandi. Oybek Qilichev va Baxtiyor Hamidullaevning urgan gollari evaziga “burgutlar” irodali g'alabaga erishishgandi - 2:1. Jizzaxdagi bahsda Bekzod G'oziev mehmonlarni oldinga olib chiqqan, hakam tomonidan qo'shib berilgan daqiqalar o'tib borayotganda “Andijon” himoyachisi Azamat Isaev o'z darvozasiga to'p kiritib qo'ygandi – 1:1.

Andijonda o'tgan so'nggi besh uchrashuv:
12.03.2011 Andijon - So'g'diyona 2:1
18.04.2009 Andijon - So'g'diyona 4:3
03.05.2008 Andijon - So'g'diyona 0:0
25.09.2006 Andijon - So'g'diyona 2:0
20.11.2004 Andijon - So'g'diyona 2:0

O'zaro o'yinlar haqida fakt : Vodiyda ushbu jamoalar o'rtasidagi o'yinlarda “burgutlar” 10 bor zafar quchishgan. 2 marta durang qayd etilgan. Jizzax klubi Andijondan 4 bor g'alaba bilan qaytgan. “So'g'diyona” ushbu klublar o'rtasidagi Andijonda kechgan o'yinlarda so'nggi bor 1999 yil g'alaba qozongan.