"Paxtakor" Denis Ivankov bilan shartnoma imzoladi

Bu haqda "Championat.asia" ijodkori SHahboz Beg'amov o'zining telegram kanalida malum qildi.

Avvalroq jamoani restartga tayyorlashda xizmat qilgan Ivankov muzokaralarning dastlabki bosqichida klub bilan kelishuvga erishmagandi. Biroq kuni kecha "Paxtakor" O'zbekiston terma jamoasi darvozabonlar murabbiyi bilan muzokarani qayta tiklab, Ivankovning shartlariga rozilik bildirgan klub yakunda tajribali mutaxassis bilan bugun shartnoma imzoladi.

Kelishuv yil yakuniga qadar amal qiladi va dekabrda shartnoma uzaytirish ko'rib chiqiladi.

Ivankovning vazifasi klub tizimidagi barcha jamoalar, akademiyadan tortib birinchi jamoa darvozabonlar malakasini oshirishdan iborat va darvozabonlar murabbiylarining ishini nazorat qiladi.

Etiborlisi, "Paxtakor"ning hozirgi kundagi har ikkala asosiy tarkib darvozabonlari - Suyunov va Quvvatov aynan Denis Ivankov shogirdlari sanaladi. Garchi asosiy jamoada ularni turkiyalik mutaxassis shug'ullantirsa ham, endilikda "Paxtakor"da ustoz va shogirdlar "Mashal" yoki "Nasaf"da bo'lgani kabi birgalikda ishlashadi.